БАҚ менің бағымды ашқан

Бұл қала әкімінің орынбасары Мира Қазбекованың өз сөзі. Қасиетті жұма күні қаланың бас идеологы редакциямызға арнайы ат басын бұрып, «Ақмешіт апталығы» газеті ұжымының жұмыс барысымен танысты. Билік пен БАҚ арасындағы байланысты нығайтуға дәнекер болды.

Бүгінде газет – шаһардың шырайын ашқан маңызды оқиғалар мен жарқын жұмыстарын, тарихы мен табысын қаламынан қалт жібермей, жұртшылық назарына ұсынып, оқырманның оң көзқарасын қалыптастырған басылымның бірі. Кездесуде осы мәселе қозғалды, басылым бетінде жарияланып жүрген өзекті тақырыптар төңірегінде талқы жүрді. «Сыр медиа» ЖШС бас директорының орынбасары Дәурен Омаров серіктестікке қарасты басылымдар, оның ішінде «Ақмешіт апталығы» туралы да ой тарқатты. Газет редакторының міндетін атқарушы Қаныбек Әбдуов алдағы жоспарларымен бөлісті. Алдағы уақытта жаңа айдарлар ашылып, ел мүддесін көздеген өзекті мәселелер болатыны көтерілді. Әңгіме барысында Мира Жомартқызы апталық газеттің қала тарихындағы орны ерекше екендігін атап өтті.

– Қазақылықтың қаймағы бұзылмаған, сөз қадірін ұғына білген Сыр өңірінде осындай сапалы ана тілді басылымның шығуы қуантарлық жағдай. Қаланың ең күрмеулі деген мәселесі, кейде біз байқай бермейтін тұстары газет бетінде ұдайы жарияланып отырады. Алдағы уақытта да дәл осындай қарқынмен бірлесе жұмыс істейміз деген сенімдемін. Әсіресе, тұрғындар базынасы айтылған мақалалардың әлеуметтік желі арқылы оқырманға жедел жетуі маңызды рөл атқарып отыр. Редакция ұжымына шығармашылық табыс тілеймін, – деді Мира Қазбекова.