Илья ауырлыққа иілмейді
Илья Ильин жеңіс тұғырына қайта шықты. Ташкент төрінде өткен халықаралық турнирде сырбойылық оғлан оза шауып, алтыннан алқа тағынды. 102 келі салмақта сынға түскен толағай қоссайыс нәтижесінде 355 келі зілтемірді ырқына бағындырып, әлемдік аренадағы сәтсіздіктеріне нүкте қойды. Ильин тұрған мінберге көз тастасаң қайсарлық пен мұқалмас ерік жігерді көресіз. Бұл жеңіс – иісі қазақтың жеңісі.Осыдан бірер жыл бұрын допинг дауына іліккен жерлесіміз өзіне тиесілі 2008 жылғы Бейжің және 2012 жылғы Лондон жылғы олимпиада ойындарының алтын жүлдесінен айырылып, екі жылға үлкен спорттан шеттетілген болатын. Әрине, IWF тәртіптік комиссиясының шешімі спортшыларға жасалған шынайы қастандық болғаны рас. Қолдағысын тартып алғандай болды. Айтары жоқ. Халықаралық олимпиада комитетінің шешімімен алтындар кері қайтарылса да, олар халқы, мемлекеті үшін нағыз чемпион болып қала бермек. Допинг сынамаларынан кейін бірқатар чемпиондар спорттық мансабын аяқтағанды. Салмағы 400 келіге жуық зілтемірді көтергенмен, қапыда кезіккен қиындықты көтере алмай сағы сынған саңлақтар қанша. Спорттың мінез бен төзімді қатар талап ететінін білесіз. Жаттығу залында түйсігіңді тығырықтан азат ете алмасаң сен нағыз чемпион емессің.
Сүреңсіз уақыттан сүрінбей өту – нағыз ердің ісі. Ильин спорттық ғұмырындағы дағдарыстан кейін жеңіс тұғырына қайта оралды. Бұл – заңдылық та шығар. Себебі табиғатынан жеңімпаз болып туған ауыратлет күні бүгінге дейін дүбірлі додада екінші болып көрген емес. Ертерек Ильиннің ел біріншілігінде топ жарғанын айтқан болатынбыз. Ал, бүгінгі Ташкент төріндегі тамаша жеңіс жаңа жетістікке жол ашатынына бек сенімдіміз. Даңқты спортшы өзі сөзінде «Әрине, мен төрт дүркін Олимпиада чемпионы болуды армандаймын. Біріншіден, мен қазір он жыл бұрын жоспарлаған жоспармен жүріп келемін. Екіншіден, мен бұл спортты жақсы көремін. Өз ісімді сапалы әрі әдемі көрсете аламын.Оның үстіне мен әлі жаспын. 29 жас – бұл спортшының шыңы. Себебі менде ақылмен саралау, шеберлік пен тәжірибе, жалпы дайындық жеткілікті» деген болатын. Сөзі мен ісі үйлесім тапқан спортшы ешқашан айтқанынан жаңылған емес.Қыр астында жапон жерінде жалауы желбірейтін жазғы олимпиада. Төрт жылда бір келетін байрақты бәсекенің басқа додадан бәсі жоғары. Ильинді жарыстан шеттету мерзімі он сегіздің қазанында аяқталған болатын. Демек, біздің толағай Токиоға апарар жолдама үшін күресе алады. Қазақтың тау тұлғалы Толағай бейнесімен даңқы жер жарған саф алтындай сары баласына халықтың құрметі ерекше. Жарақат салмай жаратқан өзі жәрдемдессе екен. Чемпионның жарқын жеңістерін исі қазақ көруге құштар.
Кешелі-бүгін көкжәшіктен Ильиннің сұхбатын көрген боларсыз. Жауап барысында жерлестің жанарындағы жанталасты көрдім. Бұл жеңіс жолындағы күрес. Батырымыз даңқтың дәруменмен келмейтінін дәлелдейтін күн де алыс емес.
Бауыржан ҚОЖАНТАЙ
