Қызылордада сора егумен айналысқан облыс тұрғыны ұсталды
2020 жылдың 1 тамыз күні қызылордалық полицейлермен «Қарасора-2020» арнайы жедел-профилактикалық іс-шарасын өткізу барысында Қармақшы ауданы «Ақкеспе» деп аталатын жерде егілген 523 түп сора (жалпы салмағы 6 477,11гр ) өсімдігі анықталды.
Сонымен қатар, оқиға орнын қарап-тексеру барысында қос ішіне төселген кілем астынан газетке оралған өзіне тән ерекше иісі бар есірткі затына ұқсас шөп алынды. Сараптама қорытындысымен алынған ерекше иісі бар заттар салмағы 41,29 гр «кептірілген марихуана» екендігі анықталған.
Жедел-іздестіру іс-шараларын жүргізу барысында Қармақшы ауданының тұрғыны ұсталды.
Күдікті уақытша ұстау абақтысына қамаққа алынды. Қазіргі таңда бұл дерек бойынша Қазақстан Республикасы Қылмыстық кодексінің 300-бабының 2-бөлігінің 3-тармағымен (ірі мөлшерде өсiруге тыйым салынған өсiмдiктердi егу немесе өсiру немесе сораның, көкнәрдiң немесе құрамында есiрткi заттар бар басқа да өсiмдiктердiң сұрыптарын егіп-өсіру) сотқа дейінгі тергеп-тексеру амалдары жүргізілуде.
Қызылорда облысы Полиция департаментінің баспасөз қызметі
