Бөлінген қаржының есебі бар
Жер жаһанды жайлаған коронавирус дерті күннен-күнге үдеп, сан мыңдаған адамның тағдырын жалмаған қауіпті дертке айналғаны белгілі. Бүгінде сәл де болса бәсеңдегенімен, қауіп басым. Бірінші толқында мемлекет те, медициналық нысандар да абдырап, індетпен күресті дайындықсыз өткерген еді. Қыруар қаржы жұмсалып, еларалық есепсіз көмек жөнелтілді. Енді, міне, індет басылған шақта шығынды аңдап, есеп берер кез жетті. Қанша қаражат қайда кеткенін, жұмсалған ақшаның жөн-жобасын бағамдау маңызды. Осы мақсатта «Әлеуметтік медициналық сақтандыру қоры» КЕАҚ облыс бойынша филиалының директоры Бақыт Исмаханбетов пандемия кезіндегі қаржының мән-жайын мәлімдеп, баспасөз конференциясын өткізді.Алдымен филиал басшысы сақтандыру қорынан бөлінген қаражаттың көрсеткішінен бастады. Бақыт Исмаханбетовтың сөзінше, міндетті әлеуметтік медициналық сақтандыру қорынан коронавирус инфекциясымен күреске 6 млрд 466 млн теңге көлемінде қаржы бөлінген. Аталған қаржы пандемия кезінде медициналық көмек көрсетуге, медицина қызметкерлеріне үстемақы төлеуге, полимеразалық тізбекті реакцияны (ПТР) анықтауға және мобильді бригадаға, үйдегі стационарға жұмсалыпты.
– Қор филиалы медициналық көмектің сапасын жақсарту үшін ұйымдардың тарифтерін 2 есеге көтерді. Нәтижесінде коронавирус инфекциясымен және пневмониямен ауырған науқастарды емдеуге жеке емдеу мекемелерін тартуға мүмкіндік туды. Медициналық ұйымдарға дәрі-дәрмектерді толық жеткізу үшін «СК-Фармация» жауапкершілігі шектеулі серіктестігімен келісім шарт жасалды. Бірыңғай дистрибьюторға жыл соңына дейін жеткізілетін препараттар үшін жеткізушілерге және өндіруші зауыттарға аванстық төлем төледі, – деді «Әлеуметтік медициналық сақтандыру қоры» КЕАҚ облыс бойынша филиалының директоры Бақыт Исмаханбетов.
Қазіргі таңда коронавирус инфекциясының болжамды екінші толқынына даярлық толық әзірленген. Филиал директоры халықты дәрі-дәрмекпен қамту үшін қаржы жеткілікті екенін айтып, бүгінде дәрінің екі айлық қоры бар екенін жеткізді. Сондай-ақ, аймақта індетпен күресуге 30 медициналық ұйым тартылып, қалалық және аудандық ауруханаларға бөлінген.
Е.ШАМШАДИН
