ҚЫЗЫЛОРДАДА МЕМЛЕКЕТТІК ҚЫЗМЕТКЕ ҮМІТКЕРЛЕРДІҢ БІЛІМІ ТӨМЕН
Биылғы жылдың бірінші жартыжылдығында Қызылорда облысы бойынша мемлекеттік қызметке іріктеудің алғашқы деңгейіне 1414 адам қатысып, оның 515-і шекті мәннен төмен емес нәтижеге ие болған, деп хабарлайды ҚазАқпарат тілшісі ҚР Мемлекеттік қызмет істері және сыбайлас жемқорлыққа қарсы іс-қимыл агенттігінің Қызылорда облысы бойынша департаментіне сілтеме жасап.Атап айтқанда, мемлекеттік әкімшілік қызметке үміткерлердің 36,4 пайызы немесе үштен бірі ғана білім деңгейінің талапқа сай екендігін дәлелдей алған. Сонымен қатар, құқық қорғау органдарына алғаш кіретін азаматтарды тестілеуге 1021 адам қатысып, олардың 494 немесе 48,4 пайызы шекті мәннен төмен емес нәтижені иеленген. «Қазіргі таңда, мемлекеттік қызметке азаматтарды іріктеудің үш деңгейі қарастырылған. Оның алғашқы деңгейінде үміткердің заңнамалық біліктілігі тест арқылы анықталса, екіншісінде іскерлік қасиеті бағаланады. Соңғысы кәсіби біліктілігіне қатысты әңгімелесуден өту болып белгіленген. Мемлекеттік қызметке үміткерлердің тестке өз дайындық деңгейлерін тексеру мақсатында үстіміздегі жылдың мамыр айынан бастап "Персоналды басқару орталығы" АҚ арқылы сынама тестілеу басталды. Сынама тестілеуге қатысу үшін алдын ала "Персоналды басқару орталығы" акционерлік қоғамының аймақтағы маманына хабарласып, сынама тестілеудің шарттарын білуге болады», - деді Қазақстан Республикасы Мемлекеттік қызмет істері және сыбайлас жемқорлыққа қарсы іс-қимыл агенттігінің Қызылорда облысы бойынша департаментінің басшысы Абзал Мұхимов. Жыл басынан бері облыстың мемлекеттік органдарындағы бос лауазымдарға орналасуға өткізілген 693 конкурсқа 965 адам қатысып, орта есеппен бір лауазымға 1,4 адамнан келген.
