ҚҰРБАН АЙТ МЕЙРАМЫ АТАЛЫП ӨТТІ
Күллі мұсылман қауымы үшін қасиетті Құрбан айт мейрамы - қайырымдылық пен кеңпейілділіктің, береке-бірліктің бейнесі саналады.Бүгін орталық мешітке жиналған жамағатты аудан әкімі Мұхтар Әуесұлы Құрбан айт мейрамымен құттықтады. Аудан басшысы өз сөзінде имандылық ізгі істерден басталатынына тоқталып, халықтың ықылас-ниеттерінің түзу, бірлігінің нық болуын тіледі. Мұнан соң орталық мешіттің бас имамы Қабылғазиев Қайырхан мейрамның мән-маңызын түсіндіріп, жамағатпен айт намазын оқыды.
Намаздан кейін жиналған қауым жайылған дастарханнан дәм татты. Мешіт ауласындағы арнайы белгіленген орында көпшілік ақсақалдардың батасын алып, құрбандық шалды. Құрбан айт мерекесіне орай қол күрес, гір тасын көтеру және арқан тартыс ойындары ұйымдастырылып, сайыс жеңімпаздары сый-сияпатқа ие болды.
