ҚАЗАҚСТАН ХАЛҚЫНЫҢ САНЫ 18,29 МЛН АДАМҒА ЖЕТТІ
Қазақстанда халық саны 2018 жылдың 1 тамызында 18 млн 292,7 мың адамға жетті. Бұл 2017 жылдың 1 тамызындағы көрсеткіштен 238,7 мың адамға немесе 1,3% артық, - деп хабарлайды ҚазАқпарат ҚР ҰЭМ Статистика комитеті.Атап айтқанда, есептік кезеңде қала тұрғындарының саны 10 млн 544,3 мың адам немесе 57,6 процент, ал ауыл халқының саны 7 млн 748,4 мың адам немесе 42,4 процент. Республика халқының табиғи өсімі есептік кезеңде 4,4 мың адамға (3,1%) өсіп, 150 мың адамды құраған. Қарастырылып отырған кезеңде 78 мың адам қайтыс болған, былтырғыдан 1% артық. Көші-қон органдарының ұсынған ақпараты бойынша, 2018 жылдың қаңтар-шілде аралығында елімізге келіп тіркелгендер саны 2017 жылғы көрсеткіштен 24,8% азайып, 7306 адам болған. Елімізден кетіп жатқан мигранттар саны 12,8% артып, 21 894 адамды құраған. Негізгі миграциялық алмасу ТМД елдерімен жүріп жатыр.
