Рождество қандай мереке?
7 қаңтар – православ христиандарының Рождество мерекесі. 6 қаңтар күні сағат кешкі 22.00-де құдайға құлшылық етуден басталатын мереке түн ортасына дейін созылады, деп хабарлайды Kyzylorda-news.kz ақпараттық агенттігі. Аңыз-әңгімелерге сәйкес, бұл күні Вифлеем қалашығында ғажайып оқиға орын алып, Құдай ұлы Иисус дүниеге келген. Бұл мереке әлемнің жаңаруының, игілік пен әділдіктің, қайырымдылықтың және көмек пен қамқорлыққа зәру адамдарға шынайы көңіл бөлудің нышаны болып саналады.
Жалпы, Рождество мерекесін барлық христиандар атап өтеді. Католиктер 25 желтоқсанда мерекелесе, православтар 7 қаңтарда тойлайды. Бұл діни мерекені әлемнің 145 елі атап өтеді.
Бұл мерекеде Рождество алдындағы кештен бастап, шіркеулерде құдайға табыну салтанаттары өткізіледі. Бұл түнде рождество алдындағы ауыз бекіту аяқталып, дәстүрлі тағамдарға толы мерекелік дастархан жайылады.
Айта кетейік, Қазақстан Республикасы Еңбек кодексінің 96-бабына сәйкес, Құрбан айт және Рождество діни мерекелері ресми мерекелерге жатпайды, бірақ демалыс күндері болып саналады. Осыған орай, 7 қаңтар күні қазақстандықтар демалады.
