Қызылордалық полицейлер кезекті жеңістеріне қол жеткізді
Жеке құраммен өткізілген кәсіби қызметтік даярлық сабағында Қазақстан Республикасы Ішкі істер министрлігі чемпионатының 2 жеңімпазы марапатталды.Жуырда Талдықорған қаласында «Самбо» күресінен Қазақстан Республикасы Ішкі істер министрлігінің чемпионаты өтті.
Аталмыш чемпионатқа Қызылорда облысы Полиция департаменті құрамасы атынан Жылдам қимылдайтын арнайы жасағының инспекторы, полиция аға лейтенанты Ержан Абдуллаев және оқу жаттығу взводының аға инспекторы полиция майоры Досымов Жасұлан қатысып, бақтарын сынады.
90 килограмм салмақ категориясы бойынша Ержан Абдуллаев 1 орынды иеленіп алтын медальға қол жеткізсе, 100 килограмм салмақта Досымов Жасұлан 3 орынды жеңіп алды.
Айта кетерлік жайт, Дзюдо және самбо күресінен Қазақстан Республикасының спорт шебері полиция аға лейтенанты Ержан Абдуллаев 2015 жылы жекпе-жек сайысынан ҚР ІІМ чемпионатында 2-орын иеленсе, 2017 жылы Америка құрама штаттарында өткен Бүкіләлемдік полицейлер мен өрт сөндірушілер арасында өткен әлем чемпионатында ел намысын қорғап, дзюдо күресінен 3-орын, греплинг күресінен 2-орынды жеңіп алды.
Сол сияқты, 2018 жылы самбодан өткен ел чемпионатында топ жарса, осы жылы Алматы қаласында дзюдодан өткізілген «Конфедерация кубогінде» командалық 3-орынға қол жеткізген.
Қызылорда облысы Полиция департаментінің баспасөз қызметі
