ЖАҢАҚОРҒАН ӘЗІЛКЕШТЕРІ ЧЕМПИОН АТАНДЫ
Жаңақорған аудандық «Жаңақорған құрамасы» жайдарман командасы республикалық «Jaidarman live» жобасының – Премьер-лига чемпионы атанды.
Команданы аудандық «Жастар ресурстық орталығы» КММ-ін басқарған Нұрбол Бакиров 2014 жылы орталық жанынан құрып, алдымен аудандық байқауларға қатысып бастады. Аудан әкімдігінің демеушілігімен Қызылорда қаласы мен Түркістан қаласындағы облыстық, қалалық турнирлерге қатысты. Бірақ төменгі орындардан көрініп жүрді.
2015 жылы орталықтың белсенді мүшесі, аудандық мәслихат депутаты Арман Мәжитов өз жетекшілігіне алып, команданы қайта жасақтады. Өз қаржысына және бірқатар демеушінің қолдауымен Астана қаласында өтетін турнирлерге қатысып, жүлделі орындарға іліге бастады. 2016 жылы Оңтүстік Қазақстан облысы Ордабасы ауданы әкімі, Түркістан қаласы әкімі кубогының иегері, 2016 жылы Қызылорда облысының чемпионы атанды.
2016 және 2017 жылы Астана қаласында өткен маусымашар «Жайдарман» ойындарында команда «Көрермен көзайымы», сондай ақ команда капитаны Есқара Бакиров «Үздік ойыншы» номинациясымен марапатталды. Ал биыл қазан айында Шымкент қаласы әкімінің кубогы үшін республикалық турнирде жеңімпаз болды.
