ҚАНТТЫҢ ПАЙДАСЫ ДА БАР
Асүй тәттісі – қанттың қыз-келіншектер сұлулығын арттыруға оң септігін тигізетінін көпшілік біле бермейді. Ғалымдар аталмыш тәттінің дене күтімінде бетімізден бастап аяғымызға дейін пайдасы өте көп екенін алға тартады.Әрине, тек сыртқы теріге қолдансақ. Мәселен, ерніңіз жібектей жұмсақ болсын десеңіз саусағыңызды сулап, содан соң қантқа салыңыз. Сол саусағыңызбен айналдыра қозғап, ерніңізді уқалаңыз. Егер ерніңіз құрғақ және көп жарылатын болса, осы әдіс жақсы көмектеседі. Бұл жерде қант кәдіміг косметикалық скраб рөлін атқарады. Ал, денеге арналған скраб жасау үшін бірнеше бананды езіп, пюре жасаңыз. Сол банан езбесін 1 стақан қантпен араластырыңыз. Нәтижесінде денеге арналған тәтті иісті және ылғалдандырушы скраб аласыз. Мұндай скрабты аптасына бір рет қолданғанның өзі жарайды. Денеңіздің жұмсара түскенін байқайсыз. Тегіс күнге күю үшін де пайдасы мол. Егер сіз жағажайға суға түсуге барсаңыз, денеңіз күнге тегіс күю үшін майлы скраб қолданыңыз. Қантты зәйтүн майымен араластырып, арқаңызға, иығыңызға және аяқтарыңызға жағасыз. Содан соң жуып тастайсыз. Сондай-ақ, қанттың ащы жалбыз майымен қосындысы өкшенің қатаюына қарсы таптырмас ем. Ол терінің өлген жасушаларын қалпына келтіріп, табанды жұмсартады. Жалбыз майы аяқтың терлеуін де кетіреді. Ең бастысы, қолыңыздың жас көрінуін қалайсыз ба? Онда 1 стақан қантты 1/3 стақан зәйтүн майымен және 1 капсула Е дәруменімен араластырыңыз. Дайын қосындымен қолыңызды уқалап, жуып тастаңыз. Содан соң кептіріп, қолға арналған крем жағып алыңыз.
Дайындаған: Бағлан ТІЛЕУБЕРГЕНОВА
