Көмірқышқыл газын анықтайтын датчиктер кімдерге орнатылады?
Биылғы жылу беру маусымында жергілікті бюджеттен аз қамтылған, көпбалалы, тұрмыс жағдайы төмен отбасылар тұратын үйлерге 1000 дана датчик сатып алынды. Алдағы уақытта жергілікті бюджет есебінен тағы 2830 дана датчик алу жоспарлануда.
Бұл туралы Қызылорда облысы ТЖД дүлей зілзалалар қауіп-қатерін азайту және азаматтық қорғау саласындағы бақылау басқармасының басшысы Бақтияр Тұрманов мәлімдеді.
"Қазіргі таңда аудандық Төтенше жағдайлар бөлімдеріне 60 данадан датчиктер беріліп, Облыстық жұмыспен қамтуды үйлестіру және әлеуметтік бағдарламалар басқармасының ағымдағы жылғы қыркүйек айындағы мәліметі бойынша 26 қазаннан бастап осы уақытқа дейін облыс бойыша барлығы 442 дана датчиктер орнатылды. Облыс бойынша аз қамтылған, көпбалалы, тұрмыс жағдайы төмен отбасылар саны барлығы 1528-і құрайды",-деді Бақтияр Махамбетжанұлы.
Сонымен қатар ескертетін жағдай аталған датчиктер тек көмірқышқыл газын анықтайтындықтан көмір отынымен жылытылатын үйлерге орнатылуда. Бұл бағытта жұмыстар облыс бойынша аталған отбасылар 100%-ға қамтылғанға дейін жалғасын табатын болады.
