Ақмешіт апталығы

Халыққа қызмет етіп келе жатқан мекемелердің ішінде «Жедел әрекет ету орталығы» коммуналдық мемлекеттік мекемесі. Уақытпен санаспай жұмыс істейтін осынау орталықтың тыныс-тіршілігіне етене еніп, қауырт .

Күні-түні үздіксіз қызмет ететін жұмыс тобы кала тұрғындарын толғандырған мәселелерін шешумен айналысады. Яғни, төтенше жағдайларға байланысты барлық шағым осы орталыққа түседі. Күніге 300-ге жуық қоңырауға жауап беретін қызметкерлердің жұмысын көрсеңіз көз қуантарлық. Соның арасында тұрғындар қоңырауынан кейінгі мәселенің шешіліп-шешілмегенін қағазға түсіріп отырады екен. Егер мәселе шешімін таппаса, оны келесі ауысымдағы маман өз міндетіне алады. Осылайша жұртпен тығыз байланыста отырған оларға артар жүк те, жауапкершілікте мол.

      Өткен жылдың аяғында облыс әкімі облыстық цифрлық технологиялар басқармасына қарасты осы «Жедел әрекет орталығының» КММ-дегі 109 және 112 қызметінің ашылуына қатысқанын естіген боларсыз. Міне орталық сол уақыттан бастап халыққа тұрақты түрде қызмет көрсетіп келеді.

Айта кетейік, бұл жобада 101 (төтенше жағдай), 102 (полиция), 103 (жедел-жәрдем) жедел желілері 112 жүйесіне біріктірілген. Ал мекеменің барлық көлігі GPS-пен қамтылған. Аталмыш жүйе шақырушы тұлғаның мекен-жайын көрсетіп қана қоймай, өтініш берушіге оңай келудің жолын да көрсетеді. Бұл жоба іске қосылғалы халықтың да жұмысы жеңілдеп, орталықтың да жұмысы оңтайланған. Естеріңізге сала кетейік, өткен жылдың ортасында «109 – біріңғай байланыс орталығын» құру жұмыстары басталған еді. Соның арқасында қаланың инфрақұрылымына қызмет көрсетуге тартылған барлық коммуналдық қызметтер біріктірілген. Мәселен жылу, электр, ауыз су т.б. мәселелер бойынша барлық арыз-шағым 109 бірыңғай нөмірі бойынша қабылданады. Ал бұған дейін қалай болып еді? Жауап берейік.

Күні кешеге дейін қала тұрғындары 24 коммуналдық және апат ұйымының, 40 облыстық басқарма мен қалалық бөлімнің телефон нөмірін жадында ұстап жүруге мәжбүр еді. Мұны сол орталықтың мамандары айтты. Олай емес дей алмассыз. Өйткені күнделікті көзбен көріп жүрген жайт қой. Барлығымыздың басымыздан өткен. Ал жоба қолға алынғалы мекемелер нөмірін дедектеп іздеу шынымен доғарылды. Қазір бір ғана 109-ға қоңырау шалсаңыз, көмек көрсету орталығы көмегін аяп қалмайды.

   Естеріңізде болса, облыс әкімі өз сөзінде «Аталған 109, 112 нөмерлеріне келіп түсетін шақыртуларды талдау және олардың орындалуына моноторинг жүргізу, «Ахуалдық орталығы» жүйесімен біріктірілгенін, жаңа жүйенің ірі коммуналдық апаттар, жол-көлік оқиғалары, су тасқыны жағдайлары, дауылдар және басқа да табиғи құбылыстар кезінде жылдам көмек көрсетуге септігін тигізетін және цифрлық технологияды қолданудың өмір сүру сапасын жақсартуға мүмкіндік беретінін» тілге тиек етті. Дұрыс. Дамыған технологияны халық игілігіне қолдану ойлағандай пайда әкеліп жатыр.

Бұл орталықтың жұмысы шынымен қауырт. 40-қа тарта қызметкер, оның ішінде 28 оператор 12 сағатқа бөлініп, төрт ауысымда демалыссыз һәм үзіліссіз жұмыс істейді. Жауапты мамандар тұрғындар қоңырауына дамылсыз жауап беріп жатыр, әйтеуір. Көргеніміз осы. Тағы бір айта кететін жайт, әртүрлі жағдай бойынша хабарласқан тұрғындар көбіне су жүйесіндегі ахуалға қатысты болатынына көзіміз жетті. Бұл да бір мәселе.

–Америкадағы «9-1-1» сияқты бір телефон арқылы барлық проблема шешуге болады. Азанда кезекшілікке түскенде барлық мекемеге хабарласып, қай жерде жарық өшірілді, су қай жерде болмайды, соның бәрін біліп, халыққа айтып отырамыз. Психо-эмоционалды ахуал жақсы болсын, мынандай кезде орындалады, жедел оқиға болса, біз бағыттап отырамыз,– деді орталық директоры Ғани Тасмағанбетов.

Алғашында орталыққа күніге 20-30 қоңырау келіп түскен екен. Кейін бұл көрсеткіш 200-300 қоңырауға көбейген. Демек, орталық қызметкерлерінің дәнекер болуымен бір күнде 300 тұрғынның мәселесі шешіледі деген сөз. Барлық мәселе бір нөмірге хабарлассаңыз шешіледі. Тіпті, елсіз жерде қалып яки байланысы жоқ жерде оқыс жағдайға тап болсаңыз да 109 нөміріне хабарлассаңыз, сіздің мекен-жайыңыз құзырлы орындарға хабарланады. Яғни, хабарласуда ешқандай мәселе туындамайды.

Міне, бүгінде қала тұрғындарының коммуналдық мәселелерін қамтамасыз етіп отырған осы бір пилоттық жоба алдағы уақытта облыс көлемін тұтас қамтиды деп күтілуде. Қазірдің өзінде-ақ аудан тұрғындары орталыққа хабарласып, шешімін таппаған мәселелері бойынша сауалын жолдауда. Бұл турасында нақты қадам жасалып, ұсыныстар қаралуда.

Біз орталықтан шығар уақытта телефон қайта шырылдады. Бұл жолы кім екен?

Алло, «Жедел әрекет ету орталығы», сізді тыңдап тұр. Сізге қандай көмек көрсете аламын?