12 сәуір – Бүкіләлемдік авиация және космонавтика күні
Бүкіләлемдік авиация және космонавтика күні (Адамның ғарышқа ұшуының халықаралық күні) 1961 жылы 12 сәуірде тұңғыш ғарышкер - Юрий Алексеевич Гагарин ғарышқа қазақ жеріндегі «Байқоңыр» ғарыш айлағынан ұшты. Бертін келе «Құс жолына» сапар шегу бақыты қазақ халқының үш ұлына да бұйырды. Олар - Тоқтар Әубәкіров, Талғат Мұсабаев және Айдын Айымбетов.
Авиация және космонавтика күніне халықаралық мәртебе 1968 жылы Халықаралық авиация федерациясының конференциясында берілді. 2011 жылдан бастап оған тағы бір атау қосылды - Адамның ғарышқа ұшуының халықаралық күні (International Day of Human Space Flight). 2011 жылдың 7 сәуірі күні БҰҰ Бас Ассамблеясының арнайы пленарлық отырысында ғарыш кеңістігін игеру ісіндегі алғашқы қадамға 50 жыл толуына орай арнайы қарар қабылданды. Оның тең авторлары әлемнің 60-тан астам мемлекеті болды.
