Мақтааралдықтардың мәселесі – Сырбойылықтардың жүрегінде
Өзбекстанның Сырдария облысындағы Сардоба су қоймасының бұзылуына байланысты төтенше жағдай орын алды. Оның зардабы көршілес Түркістан облысы, Мақтаарал ауданының он ауылын су басты.
Бүгінде су басқан ауыл халқына көмек қолын созған жанашырлар жан-жақтан шығып жатыр. Осыған орай біздің облыста да еріктілер штабы құрылды, өз жұмысын бастады. Түркістандықтарға азық-түлік заттар жиналып жатыр. Бұл туралы облыстық жастар ресурстық орталығының директоры Бауыржан Мәстеков хабарлады.
– Қазір Мақтаарал ауданындағы су астында қалған ауыл халқына керекті заттар жиналып жатыр. Біз ол жақпен байланысып отырмыз. Керек заттарды сұрап алдық. Солардың сұранысына сай азық-түліктен басқа, киім-кешек, гигиеналық, ұзақ сақталатын заттар жиналуда. Бүгінде үкіметтік емес ұйымдардан, жастардан, еріктілерден арнайы комиссия құрылды, – деп жеткізді.
Сырбойылықтардың қамқорлық шарасы жуық арада көрші облысқа аттанады. Бұл – елдік мәселеге деген еріктілердің мезіреті.
«Ақмешіт-ақпарат»
