Ақмешіт апталығы

 «Ұлы Жеңіс күні ел жадында мәңгілік қалатын тарихи мереке. «Қазақконцерт» ұжымы барша қазақстандықтарды осы мерекемен құттықтайды. Әсіресе соғыста алдыңғы қатарда болған батырлар мен тылда жүріп ерлік көрсеткен ардагерлеріміз үшін бұл ерекше күн. Бұл орайда мерекелік көңіл-күй сыйлайтын іс-шаралардың орны бөлек. Осы арқылы біз батыр бабаларымыздың жауынгерлік жолы мен қайсарлығын насихаттап, ән-жырға қосып, жас ұрпақтың санасына сіңіре білуіміз керек. Қазақконцерт ұсынатын биылғы мерекелік іс-шаралар кешені онлайн форматта өткізілмек«,- деп атап өтті «Қазақконцерт» МКҰ директоры Жеңіс Сейдуллаұлы. 

Қазақконцерт әртістері бейбіт өмір сыйлаған батыр бабаларымыздың рухына, соғыс және тыл ардагерлерінің ерлігіне тағзым етіп, өздерінің шынайы алғыстарын баршаға белгілі поэзиялық туындылар арқылы жеткізді. 

Онлайн форматта «Соғыстан қайтқан солдаттар», «Жди меня», «Ленинградтық өренім» өлеңдері оқылды. Онлайн құттықтау «Қазақконцерт» ұйымының Instagram парақшасында «Ерлікке тағзым» атты жаңа рубрика аясында жарияланды. 

Жеңіс күніне арналған іс-шаралар бағдарламасын «Карантиндегі жұлдыз» жобасының тікелей эфирінде көрсетілетін мерекелік онлайн концерт жалғастырады. Өнер сүйер қауым Livе форматындағы жаңа концертті «Қазақтелеком» АҚ YouTube арнасынан көре алады. Бұл кеште опера және эстрада өнерінің танымал әншілері Медеу Арынбаев, Азамат Жылтыркөзов, Ерлан Рысқали, Игорь Благодарный, Мейір Байнеш, Бибігүл Жанұзақ, Альфия Каримова, Рүстем Нұржігіт, Азат Мәлік, Дина Мирманова өнер көрсетеді. 

Әлеуметтік желілерден бөлек, көрермендер «Қазақконцерт» ұйымы дайындаған «Жеңіс туы, желбіре!» атты мерекелік концерттің телекөрсетілімін тамашалай алады. 

Естеліктерге толы ерекше концерт «KAZAKH TV» телеарнасынан көрсетіледі.