Филиал директоры egov бұрыштарын аралады
Мемлекеттік қызметтерді электронды түрде алу ретін барынша ыңғайландыру мақсатында, ХҚО ғимаратынан тыс өз бетінше қызмет алуға болатын 60-тан астам egov бұрышы жұмыс істеуде. Алдағы уақытта қосымша тағы 20-дан астам бұрыш ашу жоспарлануда. Онда компьютері немесе интернетке қосылу мүмкіндігі жоқ азаматтар egov порталында қолжетімді қызметтерді өздігінен ала алады. Осыған орай, филиал директоры Айдын Қайруллаев қаладағы оқу орындары мен медициналық ұйымдарда орналасқан өзіне-өзі қызмет көрсету секторларын аралап, қызмет көрсету жұмыстарымен танысты.
«Енді қызылордалықтар электронды қызметтерді өз бетінше үйде, кеңседе немесе өзіне-өзі қызмет көрсету секторларында ала алады. Бұл жасалынып жатқан шаралар Халыққа қызмет көрсету орталықтарының ғимараттарында азаматтардың жиналуын болдырмау және вирустың таралу қаупін азайтуға мүмкіндік береді. Бүгін қаладағы бірқатар egov бұрыштарын аралап шықтым. Барлығы талапқа сай. Енді осы секторлар арқылы тұрғындар қызметтерді онлайн түрде алуына болады», – деді Айдын Бөкенбайұлы.
Сонымен қатар, филиал директоры аудан орталықтары мен ХҚО ғимараттарындағы өзіне-өзі қызмет көрсету секторларының бұрынғыдай жұмыс істейтінін айтып өтті. Ауылдық округтерде электрондық қызметтерді жергілікті әкімдік ғимаратында орналасқан egov бұрыштарында өз бетінше алуға болады.
Қазіргі таңда өзіне-өзі қызмет көрсету секторлары арқылы жалпы 4 мыңнан астам қызмет көрсетіліп, мыңға жуық тұрғын электронды цифрлы қолтаңба (ЭЦҚ) алып, мобильді азаматтар базасына тіркелен.
Айта кетейік, 1 маусымнан бастап қаламызға қарасты барлық мектептердегі egov бұрыштары өз жұмысын бастады. Бүгінгі таңда оқу орындары арқылы тұрғындар онлайн түрде баланы бірінші сыныпқа тіркеп, қажетті анықтамаларды өз беттерінше алуда.
