Жедел-жәрдем көліктеріне – тегін жанармай
«Біз біргеміз!» деп тек тіл ұшында ғана ұрандатпай, ел басына түскен қиын-қыстау кезеңде азаматтық танытып, «Қызылорда мұнай өнімдері» ЖШС облыстағы жедел-жәрдем көліктерін 50 мың литр жанармаймен тегін қамтыды. Пандемия кезінде жұмысы екі есеге ұлғайып, халыққа үздіксіз медициналық қызмет көрсетіп келе жатқан өңірдегі 27 емдеу мекемесі енді «TS» май құю бекетінен АИ 92 маркалы сұйық отанды тегін қолдануға мүмкіндік алып отыр.
– Өздеріңіз білесіздер, қазіргі таңда аймақтағы эпидемиологиялық ахуалға байланысты жедел-жәрдем көліктері күшейтілген режимде жұмыс жасап отыр. Дәрігерлер де адам өмірін сақтап қалу мақсатында барын салуда. Осы орайда серіктестіктің бас директоры Бақтияр Беқожанов бастаған ұжымымыз игі істің өнегесін көрсетіп, қол ұшын созуды құп көрдік, – дейді «Қызылорда мұнай өнімдері» ЖШС коммерциялық директоры Әлімжан Махамбетов.
Серіктестік аталған қайырымдылық шарасына 7,6 млн.теңге көлемінде қаражат бөліп отыр. Қысылтаяң шақта «Біз біргеміз!» ұранын жай ғана құйындатпа сөз деп емес, оны іс жүзінде жүзеге асырып отырған осындай қолы ашық жомарт жандардың ел ішінде әлі де бар екені көңілге қуаныш ұялатады.
Бағлан ЖАРЫЛҚАПҚЫЗЫ
