Ақмешіт апталығы

Серіктестің өз есебінен облыстағы ауруханалар мен емдеу нысандарына 50 мың литр АИ-92 маркалы бензин үлестіруді қолға алған. Аймақтағы жедел жәрдем көліктері серіктестік теңгеріміндегі кез келген жанар-жағармай бекетінен тегін сұйық отын алуына мүмкіндік жасалған. Ол үшін қызметтік көлік номері мен жүргізушінің жеке басын анықтайтын құжат болса жеткілікті. 

–Әлемді әбігерге салған індетпен күрес – адамзатқа ортақ міндет. Сол себепті «Қызылорда мұнай өнімдері» ЖШС өз қаржысы есебінен жедел жәрдем көліктеріне тегін АИ-92 маркалы бензин таратуға шешім қабылдады.  Қазіргі таңда аудандар мен Қызылорда қаласы әкімдігімен бірлесе, қызметтік көліктердің номерін нақытылау жұмыстары жүргізілуде. Соған сәйкес, әрекет ететін боламыз. Серіктестік мамандары мен құзырлы мекеме өкілдері заңсыздық орын алмауын қадағалайтын болады, – дейді «Қызылорда мұнай өнімдері» ЖШС-ның коммерциялық директоры Әлімжан Махамбетов.

Қазіргі таңда сұйық отынның аудандар мен Қызылорда қаласына бөлінісі нақтыланған. Нәтижесінде, 50 мың литр бензиннің 20 мың литрі аудандарға таратылса, қалғаны бөлігі Қызылорда қаласындағы жедел жәрдем көліктеріне үлестірілмек.

Аталған көмекке жедел жәрдем қызметкерлері де разы:

–Індеттің асқынуы салдарынан күнделікті шақырту саны артып, жұмыс режиміне өзгеріс енді. Сәйкесінше, қызметтік көліктің тұтынатын сұйық отын көлемі көбейді. Бұрын күніне 40-50 литр бензин пайдалансақ, қазіргі таңда 80-90 литрге дейін өсті. Сондықтан, мұндай көмек айтарлықтай жеңілдік сыйлайды, –деді «Қызылорда облыстық жедел жәрдем стансасы» МКК жүргізушісі Ерлан Әмзе.

Айта кетейік, «Қызылорда мұнай өнімдері» ЖШС – нарықта 20 жылға жуық тәжірибеге ие ірі мекеме. Қазіргі таңда серіктестік облыс аумағындағы бюджеттік мекемелердің 70 процентін сұйық отынмен қамтамасыз етуде. Мекеменің аймақта 20 май құю бекеті орналасқан.