Ақмешіт апталығы

Облыс әкімі Гүлшара Әбдіқалықова: – Елімізде карантиндік шектеу шараларының енгізілуіне байланысты біржолғы төлем төлеудің ережесі әзірленді. Ал, өңір бойынша 95038 адам 42500 теңге көлемінде қосымша әлеуметтік жәрдемақы алуға жүгінді. Оның ішінде, шілде айында 93273 азаматқа көмек көрсетілді. Бүгінде 37141 азаматқа автоматты түрде SMS жолданып, табысынан айырылғандығын растау жұмыстары жүргізілуде. Біржолғы төлем нақты кімдерге беріледі? Нақтылай кетейін, олардың санатында жұмысынан  толық айырылған азаматтар, жалдамалы жұмыскерлер, яғни, ақысыз демалысқа жіберілген жағдайда, жеке кәсіпкерлер, фрилансерлер бар. Соңғы санат үшін тек бір шарт бар. Ол бойынша 2020 жылдың 6 айында бір рет болса да зейнетақы жарнасын аудару керектігін ескеру қажет.

Облыс әкімі Гүлшара Әбдіқалықова: – Қызылорда облысы бойынша тіршілікті қам­тамасыз етуші кәсіпорындар мен әлеуметтік сала нысандарының алдағы жылу беру мау­сымына дайындығы бекітілген кестелерге сәйкес жүзеге асуда. Тұтынушыларды электр және жылу энергиясы, көгілдір отын және сумен қамтамасыз ететін коммуналдық кәсіп­орындардың жөндеу жұмыстары бүгінде 43 процентке орындалды. Ал, облыстың білім беру, денсаулық сақтау, мәдениет, спорт ны­сандары мен автономды қазандықтарды қал­пына келтіруді аяқтау 36 процентке жеткен. Сонымен қатар, жергілікті тұрғындарға алдағы жылу беру маусымына 163,6 мың тонна қажетті қатты отын қоры қажет. Бүгінде қала және аудан тұрғындары үшін көмір бағасының өсуіне жол бермеу мақсатында көмір өндіретін кәсіпорындармен тікелей келісімшарт жасап жатырмыз. Ал, оның өңірге жеткізілуін әзірше тоқ­татып тұрмыз. Өйткені, өздеріңіз білесіздер, күн өте ыстық. Бізге халықтың қауіпсіздігі аса маңызды. 

Облыс әкімі Гүлшара Әбдіқалықова: – Сауалыңыз өте өзекті. Қазіргі таңда облыс бойынша 184,7 мың гектар егіс егіліп, негізгі дақыл күріш егісі 89,6 мың гектарды құрады. Бүгінде су алу каналдары арқылы егіске күн­делікті секундына 404 текшеметр су алынуда. Атап айту керек, төменге Сырдария өзені арқылы секундына 520 текшеметр су тасталып, өткен жылмен салыстырғанда 180 текшеметрге аз болып отыр. Бұл өз кезегінде, сумен қамтамасыз ету барысына кері әсерін тигізіп, нәтижесінде барлық аудандардың егіс алқаптарында су тапшылығы байқалуда. Бүгінде облыс бойынша 1853 гектар күріш егісіне су жетіспей отырса, 405 гектар аумақтың мүлдем сусыз қалғандығы анықталды. Облыстың егістік алқаптарын тұ­рақты сумен қамтамасыз ету мақсатында, қазірден бастап тамыз айының 10-на дейін экология, геология және табиғи ресурстар министрлігіне Шардара су қоймасынан төменге секундына 550 текшеметр су тастауға тапсырма беру туралы Үкімет басшысына жедел ұсыныс жолдаған болатынмын. Менің ұсынысым оң шешімін тауып, бүгіннен бастап тиісті су көлемі жіберіле бастады. Ендігі міндет – осы жіберілген су көлемін тиімді пайдаланып, егілген егісті су тапшылығына ұрындырмай алып шығу. 

Облыс әкімі Гүлшара Әбдіқалықова: – Биыл аталмыш бағдарлама аясында облыста 276 жоба­ны жүзеге асыру жоспарланып, бүгінде оның 275-і іске асырылуда. Жоба шеңберінде 9 299 жұмыс орнын ашу көзделіп, қазіргі таңда оның 7 768-і жүзеге асты. Ал, қала бойынша 98 жоба қолға алынып, 2 724 азамат жұмыспен қамтылды. Жобалар тұрғын үй-коммуналдық шаруашылық нысандарын жаңғыртуға, әлеу­меттік нысандарды, көшелер мен жолдар салу­ға және жөндеуге бағытталған. Сонымен қатар, әлеуметтік нысандар мен балалар ойын алаңдары, спорт нысандарының құрылысы аялдама және көшелер жарықтандырылып, аулалар абаттандырылады. Ең бастысы, жоба­ларды жүзеге асыруда пайдаланылатын тауарлар мен қызметтердің 90 проценті – отандық өнімдер. Ал, жұмыскерлердің санитарлық-гигиеналық нормаларын сақтау үшін барлық аудандар мен облыс орталығында мобильдік пунктер құрылды.

Облыс әкімі Гүлшара Әбдіқалықова: – Алдағы 1 қыркүйекте оқу жылы облыстағы 243 мектепте қашықтан оқыту форматында бас­талады. Қалған шалғай орналасқан және ша­ғын жинақты 50 мектепте дәстүрлі оқытады деп жоспарлануда. Сонымен бірге, бастауыш сыныптардың оқушыларының ата-анасының өтініші бойынша тиісті мүмкіндіктерге қарай отырып, қатаң санитарлық шараларды сақ­таумен кезекші сыныптар ашылады деп күтілуде. Бүгінгі күнге білім беру ұйымдарын жаңа оқу жылына дайындау жұмыстары жүйелі түрде жүргізілуде. Қашықтан оқыту форматы бойынша оқушылар мен педагогтардың электрон­ды құрылғыларымен және интернет, мобильді интернет байланысымен қамтамасыз етілуіне мониторинг жүргізілді. Компьютері жоқ 300 мұғалімге кәсіподақ есебінен техникалық құралдар беріледі. Балаларды 1-сыныпқа қабылдауда медициналық анықтамалар уа­қытша талап етілмейді. Қазіргі таңда ата-аналар мектепке балалардың құжаттарын 2 түр­лі жолмен өткізе алады. Қағаз жүзінде мек­тепке тапсырылады. Ал, онлайн «egov» пор­талы арқылы іске асады. Айта кету қажет, 1-сыныпқа құжат қабылдау 1-тамызға дейін іске асырылады. Қазіргі күні 16207 баланың құжаты қабылданған. Облыстық білім басқармасының ақпараттық анализі бойынша, биыл 1-сыныпқа 19 мыңға жуық оқушы мектеп табалдырығын аттайды.

Облыс әкімі Гүлшара Әбдіқалықова: – Иә, өңірімізде жедел жәрдем шақыру 2 есеге азайды. Эпидемиологиялық ахуал күрделі кездері, яғни, шілде айының бірінші 10 күн­дігінде тәулігіне 2500-ден астам шақыртулар келіп, жүктеме 2 есеге артқан болатын. Қазіргі таңда жедел жәрдемді жалпы шақыру 2,5 есеге азайса, дене қызуымен хабарласушылар 5, пневмониямен шақыртулар 6 есеге төмендеді. Облыс бойынша «COVID-19» вирусын жұқ­тырғандар саны 2859 жағдайға жетті. Ин­фекция жұқтырғандардың 60 проценті облыс орталығында тіркелген. Короновирус індетіне қарсы күресте қазір 6 ПТР аппараты жұмыс жасауда. Тәулігіне 700 сынама алуға қол жеткізілді. Бірінші тамызға дейін тағы 4 ПТР  аппараты іске қосылады. Облыста жұмыс жасап тұрған 107 өкпені жасанды желдету аппараты (ИВЛ) бар. Сондай-ақ денсаулық сақтау министрлігіне 63 өкпені жасанды желдету аппаратына тапсырыс берілді. Қалған 67 ап­паратты демеушілер есебінен шешу бағытында жұмыс жасалуда. Айта кетейік, алдағы уақытта облыстық медицина орталығынан оттегі жүйе­сін бөлетін станция салу жоспарда бар. Бұл жоба іске асырылса, қажеттілік туындаған жағдайда аймақтағы барлық ауруханаларды қажетті оттегі мөлшерімен қамтамасыз етіп отырады. 

Облыс әкімі Гүлшара Әбдіқалықова: – Әрине, бұл өте өзекті мәселелердің бірі. Бұл бойынша жауапты сала мамандарымен бірлесіп толық зерттеу жасалды. Денсаулық сақтау басқармасының мәліметіне сәйкес биылғы жылы 170 дәрігерге сұраныс бар. Олардың ішінде 46 аймақтық дәрігер, 26 анес­тезиолог-реаниматолог, 8 неонатолог, 8 пси­хиатр, 5 фтизиатр, 5 онколог, 4 балалар хи­рургі, 5 офтальмолог, 3 инфекционист, 3 ба­лалар невропатологы, 3 оториноларинголог, 3 реабилитолог, 3 дерматовенеролог, 3 па­та­натом, 4 травматолог, 3 нефролог, 2 пульмонолог, 2 кардиолог, 2 акушер-гинеколог, 2 хирург, 2 дәрігер-лаборант, 2 терапевт, 1 уролог, 1 эндоскопист дәрігер қажет. Күшейтілген режимде жұмыс жасау кезінде медицина қызметкерлерінің жетіспеушілігінен провизорлық стационарларға жоғары оқу орнын толық аяқтамаған 5 интерн, 1 резидент уақытша жұмысқа қабылданды. Сонымен қатар, салалық министрліктің мемлекеттік тапсырысы негізінде медициналық университет түлектерін бөлу хаттамасы бойынша алдағы уақытта облысқа қосымша 123 жас маман келеді деп күтілуде. Осы мүмкіндікті пайдалана отырып, білікті дәрігер мамандарды аймаққа келіп, медицина саласының дамуына үлес қосуға шақырамыз.

Облыс әкімі Гүлшара Әбдіқалықова: – Өте орынды сұрақ. Ең басты байлық – адам денсаулығы. Алдағы уақытта да ресми шектеу шаралары аяқталғанымен өңір тұрғындарының қауіпсіздігі үшін кейбір сақтық шаралары мен талаптарды сақтап қалуымыз керек. Бұл мәселені біз жауапты мамандармен ақылдаса отырып, тиісті құжаттарды рәсімдейтін бола­мыз. Дегенмен, жерлестерімнен сұрайтыным өзіміздің және жақындарымыздың қауіпсіздігі үшін сақтық шараларын, талаптарды қатаң сақтасаңыздар. Төтенше жағдай жарияланған екі айға жуық мерзімде қатаң шектеу шаралары мен карантиндік талаптар күшейтілді. Дер кезінде қабылданған осындай шешімнің арқа­сында пандемияның алғашқы толқынына төтеп бере алдық. Алайда, шектеу шаралары жеңілдетілген бойда ел арасында сақтық шараларына мән бермеу, мамандардың кеңесіне құлақ аспау, карантиндік талаптарды бұзу фактісі күрт көбейді. Осындай талап­тарға бағынбаудың нәтижесін өздеріңіз көрдіңіздер. Індет жұқтырғандардың саны артып, арты қайғылы жағдайларға да ұласты. Көпшілігіміз жақындарымыз бен туыстарымыздан да айы­рылдық. Бұл біз үшін үлкен сабақ болды. Сол себепті індетке қарсы вакцина пайда болғанша медициналық маска, қолғап кию, оқшаулану, әлеуметтік ара қашықтықты сақтау, антисептикті тұрақты түрде пайдалану – біздің басты қаруымыз. Осыны ескеріп, ұжымдық, дәстүрлі мерекелер мен басқосулардан, той жасау, құдалық, ас беру секілді көпшілік шаралардан індетті толық жеңгенге дейін бас тарту қажет. Алдымызда барша мұсылман қауымының асыға күтетін «Құрбан айт» мерекесі келе жатыр. Облыстың бас санитарлық дәрігерінің №19 қаулысы қабылданып, қаулыға сәйкес құрбан шалу рәсімдері онлайн форматта ұйымдастырылатындығы айтылды. Сон­дықтан, мерекеде жақындарымыздың аман­дығы мен саулығы үшін көпшілік шаралардан бас тартып, жамағат болып жиналмай, отбасында атап өтуге шақырамын.