Ақмешіт апталығы

Жаңа оқу жылында жүзеге асы­рылатын өзгерістер туралы өңірлік коммуникациялар қызметінің ақпарат алаңында өткен брифингте облыстық білім басқармасының басшысы Ақзира Қасымова таныстырды.

– Жаңа оқу жылы шалғайда ор­на­ласқан шағын жинақты ауылды мектептерді қоспағанда, өңірдің бар­лық мектептерінде қашықтан оқыту форматында басталады. Биыл аймақтың 243 мектебінде оқушылар сабақты қашықтан оқиды. Қашықтан оқытуды ұйымдастыруда оқушылардың элек­тронды құрылғылармен, интер­нет­пен қамтылуы бағытында ана­лиз жүргізілді. Оқушылардың қажет­тілігіне қарай компьютер, план­шеттер берілетін болады. Бірін­ші кезекте әлеуметтік жағынан аз қамтамасыз етілген отбасылар, көп­балалы отбасының балаларына бе­ріледі. Бұл ретте басқарма тарапынан мектеп балансындағы компьютерлер уақытша беріледі. Сонымен бірге, демеушілер есебінен де планшеттер алып беру жұмыстары жүргізілуде. Бұған қоса, облыста 20 259 педагог жұмыс жасайды. Оның ішінде компью­тері жоқ мұғалімдер саны анықталуда. Облыстық мұғалімдер кәсіподағының қолдауымен 300 мұғалімге электронды құрылғы табыс етілмек», – деді Ақзира Бақтыбайқызы.

Ағымдағы жылдың 17-22 тамыз аралығында қашықтан оқытуда білім сапасын арттырып, кәсібилікті жо­ғары­лату мақсатында 18 мың педагог арнайы онлайн курстан өтеді деп жоспарлануда.

Ал, жақында ғана облыстың даму мәселелері жөнінде кеңес өткізген ҚР Премьер-Министрі Асқар Мамин алдағы уақытта аймақта қолға алы­натын байыпты бастамаларды атап өтті. Аталмыш жобалар аясында Білім және ғылым министрлігі халықтың әлеуметтік осал топтарына жататын отбасылардан шыққан оқушыларды компьютерлік техни­камен қамтамасыз ету аясында облыстың 34,7 мың оқу­шысы үшін компьютерлік техника сатып алуды көздеп отыр. Бұл Үкімет резерві есебінен жүзеге аспақ.

Сондай-ақ, Білім және ғылым ми­нистрінің айтуынша, «бір мұғалім – бір сынып» принципі жүзеге аспақ. Әдетте, бастауыш сыныптарда бір негізгі мұғалім сабақ беріп, ағылшын тілі сабағына басқа мұғалім келетін. Жаңа өзгерістер бойынша енді бастауыш сыныпта бір ғана мұғалім сабақ береді деп жоспарлануда. Ал, сақтық шараларын қатаң сақтау мақсатында ата-аналарға енді мек­теп алаңына кіруіне қатаң тыйым салынады. Сонымен қатар, балаларға мектепте ыстық тамақ беру де уақытша тоқтатылады.

«Қарнымның ашқанына емес, қадірімнің қашқанына налимын» деп біраз мұғалім көңілдегі күпті ойларын ортаға салған еді. Соңғы нарықты экономикаға көшкен тұста мұғалімнің әлеуметтік жағдайын көтеру кезек күттірмес маңызды мәселенің біріне айналды. Ұстаз мәртебесін көтеру ең алдымен оның материалдық жағдайын жақсартуға тікелей байланысты. Осы бағытта игілікті істер басталып та кетті. Білім және ғылым министрі Асхат Аймағамбетов бұл тұрғыда ауыз толтырып айтарлықтай толымды істерді қолға алып, қоғам мен еліміздің білім беру саясатындағы педагог қауымының қадір-қасиетін бекітіп берді.

– Мұғалімге жүктеме көп. Оқу жүктемесі азайған жоқ. Қайта жұ­мыстары арта түсті. Жақында мұға­лімдерді ақысыз демалысқа жіберу туралы халық арасында қате ақпараттар желдей есіп кетті. Оның ешқандай шындыққа жанаспайтындығын алға тарта оты­рып, мұғалімдер тамыз айында әдет­тегі жалақысын алатынын хабар­лаймын, – деген еді министр.  

Айта кетейік, ағымдағы жыл­дың қыркүйек айынан бастап «Мұғалім мәртебесі туралы» заңға сәйкес бірқатар қосымша төлемдер енгізілмек. Ал, алдағы жылдың қаң­тарында шәкірт жүрегіне нұр құйған жандардың жалақысы тағы да 25 процентке өседі деп жоспарлануда.

 

Бұрын білім күні мерекесінде әсем безендірілген мектеп ауласында қолына гүл шоғын ұстап, ақ бантигі желбіреп, галстук таққан оқушылар көтеріңкі көңіл-күйде сүйікті ұстазда­рымен, сыныптас-достарымен асыға қауышатын. Мұндағы толқынысқа толы сезімді айтып жеткізу мүмкін емес еді. Десе де, биыл елдегі эпи­демиологиялық ахуалға байла­ныс­ты мұндай сәтке куә болу бақыты бұйырмай тұр. Министрдің шешімі бойынша, 1 қыркүйекте мерекелік шарада сап түзеп, бас қосуға тыйым салынды. Елде таралған індетті біле тұра балаларды білім ордасына жинап, салтанатты түрде қоңырау соғу аса қисынсыз екенін мәлімдеген министр жаңа жылға дейін мектептерде еш­қандай шаралардың өткізілмеуіне кеңес берді.

СOVID-19 қазақстандықтардың өмір салтын біршама өзгертті. Оқу­шылар мен студенттер наурыз айынан онлайн оқуға көшті. Ал, ата-аналар қашықтан жұмыс істеді немесе ақысыз демалыс алып, біраз уақыт тұрақты табысынан айы­рылды. Елдегі орын алған осындай экономикалық тұрақсыздықтың сал­дарынан жоғары оқу орындарының оқу ақысы шарықтап өседі деген ақпарат халық арасында желдей есті. Дегенмен, Үкімет басындағылар бұл қауесеттің нүктесін қойды. Мемлекет тарапынан университеттерге қазіргі экономикалық қиын жағдайға қара­мастан оқу ақысын көтермеу туралы  жедел өтініш жасалған. Соңы нәтижелі болады деп күтілуде. 

Түйін: Еліміздің оқушылары бір айдан соң онлайн оқуды қайта бастайды. Мемлекеттің салалық министрлігі де «өгіз өлмейтін, арба сынбайтын» екіжақты тиімді ше­шім қабылдап, бар мүмкіндікті қарас­тыруда. Негізі, көзі қарақты жандар үшін онлайн оқыту еш жаңалық емес. Талай ел бұл сатыдан әлдеқашан өтіп кеткен. Әлем көшіп кетті, көште қалған біз ғана. Осыны түсінуіміз керек.