ҚАРМАҚШЫЛЫҚТАР ТӘУЕЛСІЗДІК КҮНІН АТАП ӨТТІ
1991 жылғы 16 желтоқсан еліміздің тарихында алтын әріптермен жазылды. Тәуелсіздік жылдарында еліміздің Ата Заңы қабылданды, ұлттық валюта – теңгеміз енгізілді. Біздің егемендігіміздің мықты тірегі – Қарулы күштері құрылып, көршілес елдермен шектесетін мемлекеттік шекарамыз рәсімделді. Бүгін ел Тәуелсіздігінің 26 жылдық мерейлі мерекесіне орай, аудандық мәдениет үйінде салтанатты кеш өтті. Айтулы шараға аудан әкімі Сұлтан Мақашов қатысып, жиылған қауымды құттықтап, тәуелсіздік жылдарында еліміздегі қол жеткізген жетістіктерге тоқталды. – Халқымыздың ұлы мерекесi – Тәуелсiздiк күнi құтты болсын! Бiздiң терең тарихымыз шежiрелi күндерге толы. Сол күндердiң барлығы бiр-ақ арнаға тоғысады, ол – азаттық, еркiндiк, тәуелсiздiк. Тәуелсiздiк мерекесi мен Тұңғыш Президент күнiнiң бiр айда қатар келуi де – үйлесiмдi құбылыс. Тәуелсiздiк пен Елбасы – егiз ұғым. Осы екi ұғым қатар тұрғанда, бiз бiртұтас елiмiздiң тарихи бейнесiн көремiз – дей келе, ауданның әлеуметтік–экономикалық дамуына елеулі үлес қосқан азаматтарға Қызылорда облысының «Құрмет грамотасын», облыс, аудан әкімдерінің «алғыс хатын» табыстады. Сондай ақ, шарада бірнеше мемлекеттік қызметшілер "ант" қабылдады. Мерекелік кеш аудан өнерпаздарының концерттік бағдарласына ұласты.
