Ұлы тұлғаның ұлық бейнесі
Ұлттық руханият пен мәдениеттің өркендеу жолында өзіндік орны бар дүниелердің бірі – мүсіндеме өнері мен ескерткіштер. Олар қашанда тарихымыз бен мәдениетіміздің құнды жәдігерлері ретінде күні бүгінге дейін өз маңыздылығын жойған емес. Себебі ол әрбір елдің өткенінен сыр шертер халықтың ұлттық құндылығы ғана емес, өткені мен бүгінін саралауға мүмкіндік береді. Ескерткіш мұралары – көне тарихтың куәсі деуіміз де сондықтан.
Жалпы, біз әңгімелеп отырған дүниелердің тарихы тереңнен бастау алады. Алғашқы қауым кезінде жауынгерлерді, балалы аналарды бейнелейтін тас мүсіндер кеңінен тараған. Ал кейінірек бұл өнер түрі түрлене, жаңғыра түсіп, ел қорғаған ерлерді, шаршы топта қара қылды қақ жара төрелігін айтқан би-шешендердің ескерткішін орнату жолға қойыла бастады. Бұл игі бастама біздің өңірде де жарқын көрініс тапты. Соның бірі 2017 жылы ашылған Алаштың және Түркі әлемінің ардақтысы Мұстафа Шоқайдың ескерткіші.
Ескерткіш халық көп жүретін арбаттың бойында орналасқан. Бұл жердің таңдалып алынғаны да бекер емес. Себебі ескерткіш маңында жоғарғы оқу орындарының ғимараттары орналасқан. Бұл өз кезегінде жастардың рухани дамып, қайраткер тұлғаның жете тануына жол ашады.
Қорқыт ата атындағы ҚМУ студенті Дархан Есқали тұлға ескерткішінің осында орналасқанын қуанышпен қабылдаған.
– Ескерткіштер қашаннан тарихтың құнды жәдігерлері ретінде өз маңыздылығын жойған емес. Себеб, оларды өткен күндердің өшпес өнегесі деп бағалаймыз. Біз тұрған Мұстафа Шоқай ескерткішінің орны жақсы таңдалып қойылған. Әрбір студент тұлғаның тарихын біледі десем қателеспегенім. Өткен кеткен ұзын жолдың үстінде бәрін көріп, оқып отырса, біз секілді жастарға үлгі-өнеге болады деп ойлаймын, – дейді студент Дархан.
Ескерткіш – Қазақстан Суретшілер одағының мүшесі, мүсінші Көшер Байғазиевтің қоладан жасаған туындысы. Гранитті тұғырын қоса есептегенде ескерткіштің жалпы биіктігі – 12 метр.
Жарасхан Қуанышбайұлы
