Бақытқа ұмтылған қала
Әлеуметтік желіге жүктелген мына сурет кім-кімді де бей-жай қалдырмаса керек. Әдейілеп түспегені байқалады. Суреттен қарапайымдылық, мейірімділік сезіледі. Жып-жылы сурет. Емделушіні шипажайға шығарып салған мекеме басшысы Индира Сансызбайқызы оны автобусқа мінгізуге өзі демеп жатқаны арбаға таңылған жан үшін рухани күш болғаны сөзсіз.
Ойды ой қозғайды демекші, осы апта қала күні өтпек. Қала әкімдігі мерекелік бағдарламаны «Алаштың анасы, бақыттың қаласы – Қызылорда!» деп атапты. Жаттанды сөз емес, ой салатындай. «Шынында да, бақыттың қаласымыз ба?» деген сауал жылт ете қалады осындайда. Ұлы ойшыл әл-Фараби айтқандай, «тұрғындары біріне-бірі көмектесетін, әрдайым қайырымдылық жасауға ұмтылатын қала ғана бақытты қалаға айналмақ».
Мереке қарсаңында тақырып пен мына суреттің үйлесе кетуі және сұрағымызға жауап болуы қуантты.
Мерекелеріңізбен, бақытқа ұмтылған қала тұрғындары!
