Тұрғындар тілегі тыңдалды
Қала әкімі Нұрлыбек Нәлібаев тұрғындарды жеке мәселелері бойынша қабылдау өткізді. Онлайн қабылдауға жүгінген тұрғындар сауалының басым бөлігі тұрғын үй, жер, жұмысқа орналасу және шағын кәсіпкерлікке байланысты болды.
Шаһар басшысының қабылдауына әлеуметтік мәселесін айта келген тұрғынның бірі – Жамбыл Баймаханова. Зейнеткер өзінің келіні, жалғыз басты ана Алтынкүл Назароваға пәтер сұрап келген. Бұл азаматша тұрғын үй алу кезегіне 2012 жылдың 15 наурызында көпбалалы аналар тобына тіркелген. Тұрғынның сауалын тыңдай келе қала әкімі бүгінгі таңда кезек ретінде 19-шы болып тұрған Алтынкүл Құдайбергенқызына жыл соңына дейін баспана кілті табысталатынын айтты.
Өз сауалына қанағаттанарлық жауап алған зейнеткер ризашылығын жеткізіп, қала басшылығына алғысын білдірді.
Сонымен қатар жеке қабылдауға жазылған тұрғындар уақытша пәтер, өз кәсібін дамыту сынды мәселелерін көтеріп, сауалдарына сәйкес толық жауап алды.
Қабылдауға келген тұрғындардың өтініштері мен ұсыныстары мұқият тыңдалды. Әр мәселені егжей-тегжейлі талдаған қала әкімі көтерілген сауалдарға байланысты тиісті сала басшыларына тапсырма берді. Тұрғындар айтқан мәселе заң аясында шешімін табатыны және мұны өз бақылауына алатынын жеткізді.
«Ақмешіт ақпарат»
