Балуандар көш бастап тұр
Алматы қаласында грек-рим, еркін және әйелдер күресі бойынша өтіп жатқан Қазақстан Республикасының чемпионатында Сыр өңірінің балуандары көш бастап тұр. Еркін күрес бойынша Қызылорданың спортшылары 2 алтын, 1 күміс және 1 қола медальді иеленіп, жалпы командалық есепте бірінші орында көш бастап тұр.Ақтық сайыста 65 келі салмақта сынға түскен Дәулет Ниязбеков қарсыласын 9:0 ұпайымен жеңсе, 79 келі салмақ дәрежесіндегі спортшымыз Ғалымжан Өсербаев 11:0 есебімен жеңіске жетті. Нәтижесінде Дәулет 8 дүркін және Ғалымжан 5 дүркін Қазақстан чемпионы атағын иемденді. Одан бөлек аталған додада 74 келіде Қанат Мұсабек күміс және 97 келіде Бекзат Тәжі қола медальдің иегері атанды.
Айта кетерлігі, Дәулет Ниязбеков өткен жылы Нұр-Сұлтанда өткен Әлем чемпионатында қола жүлдені иеленіп, Токио Олимпиадасына жолдаманы жеңіп алған болатын.
Спортшыларды чемпионатқа Әбутәліп Аманов, Камал Гаджимагамедов, Орал Тілеуқабылов пен Серік Әбдімәуленов дайындады.
«Ақмешіт-ақпарат»
