ҚАРМАҚШЫДА АУДАН ӘКІМІ АРДАГЕРЛЕРДІ ҚҰТТЫҚТАДЫ
Жаңа жыл мерекесі қарсаңында аудан әкімі Сұлтан Мақашов Ұлы Отан соғысының ардагерлері 93 жастағы Қуанышбай Бейсенбаев пен 96 жастағы Қалмырза Жарманов ақсақалдың үйінде болып, қарт майдангерлерді мерекемен құттықтады.
Бүгінде соғысты бастан кешкен қарттардың қатары сиреп бара жатса да, олардың ерлік істері ешқашан ұмытылмайды.
– Бүгінгі жас ұрпақ өздеріңіздей тұлғаларға еліктеп өсуі керек. Сол арқылы еңбекқорлықты, батырлықты бойына сіңіреді. Қазыналы қарттарымыз ұлағатты болашағымыздың кепілі. Еліміздегі барлық ардагерлеріміздің дендері сау, жастары ұзақ болғай, – деді аудан басшысы.
Сұлтан Ысқақұлы ерлік иелерін Жаңа жылмен құттықтай отырып, ардагерлерге аймақ басшысының құттықтау хатын және сый-сияпатын табыстады. Өз кезегінде ардагерлер облыс, аудан әкіміне ризашылықтарын жеткізіп, қазақ халқының мерейлі күндері көбеюін тілеп, баталарын берді.
