ҚҰТҚАРУШЫЛАР ҚЫЗМЕТІ ҚАУЫРТ
Кәсіби әскерилендірілген авариялық-құтқару қызметі туралы білесіз бе? Мұнай-газ кен орындарындағы апаттарды естіп жүрміз. Алайда сол төтенше жағдайды кімдер ауыздықтай алады? Осы және өзге де қызметтер жайлы өңірдегі кәсіби әскерилендірілген авариялық-құтқару қызметінің өкілдері журналистерге арнайы брифинг өткізді. Бұл қызмет облыста 1998 жылы құрылды. Олардың міндеті – кен орындарында болған төтенше жағдайлардың алдын-алу, дер кезінде жою. Мұндай қызмет түрі еліміздің 13 аймағында орналасқан. Олардың 2800-ден астам жоғары білікті кәсіби құтқарушылары, 600 авария-құтқару техникалары, 6700 арнайы тағайындалған құрал-жабдықтарымен тәулік бойы әзірлікте болады.
Өткен жылы аталмыш кәсіпорынға 250-ден астам дабыл келіп түскен. Сондай авариялық-құтқару жұмыстары кезінде 185 адамды құтқарып, апатты жою орындарында 319 адамға медициналық көмек көрсетілген.
– Сыр өңіріндегі мұнай өндіретін Құмкөл, Ақшабұлақ секілді кен орындарында кез келген жағдайда атқылама болуы мүмкін. Ал, біздің мамандар сол жағдайда дереу көмек көрсетеді. Мамандар – түгелімен дерлік тәжірибелі мұнайшылар. Бұл қызмет 1999 жылдан бері 15-тен астам ірі ашық атқыламаны жойды, – дейді «Кәсіби әскерилендірілген авариялық-құтқару қызметі» облыстық филиал директоры Нұрбек Момынов.
Атқылама көбіне бұрғылау жұмыстарын сапасыз жүргізген кезде туындайды екен. Қазіргі таңда құрылым толықтай материалдық-техникалық жабдықтармен қамтамасыз етіліп, кез келген қауіптің бетін қайтаруға әзір.
Жарасхан ҚУАНЫШБАЙҰЛЫ.
