ЖЫЛ БАСЫ ЖАЛАҒАШТА ТОЙЛАНДЫ
Ұлыстың Ұлы күні мерекесін Жалағаш ауданында биыл 14-22 наурыз аралығында айрықша, жан-жақты тойлау қарастырылған. Бүгін «Наурыз – дәстүр» күні аясында №201 мектеп-лицейде «Наурыз – береке бастауы» атты театрландырылған қойылым, концерттік шара өтті. «Көрісу» салт-дәстүрінен бастау алған шара мектеп-лицей оқушыларының тартуына ұласты. Күмбірлете күй төгілді, әсем әндер шырқалды, жарапазан айтылды. Наурыз тойының өзіне тән үлкен ырым асы – Наурыз көже тартылды. Аудандық білім бөлімінің әдіскері А.Әбілдаева жиылған қауымды Ұлыстың ұлы күні – Наурыз мерекесімен құттықтап, ізгі лебізін білдірді. Шара соңында оқушылар қазыналы қарияның ақ батасын алды.
