ДАРИЯДАН ТӨНЕТІН ҚАУІП ЖОҚ
Естеріңізде болса, 29-наурыз күні Қазалы ауданы, Абай ауылы тұсында Сырдария өзені арнасында мұз кептелісі жүрген болатын. Әсерінен судың деңгейі 70 см көтеріліп, өзеннің қорғаныс бөгетінің 3 жерінен су жырып, “Шағала” жазғы балалар лагерін су басты. Бүгінде дария деңгейі бір қалыпты. Бұл туралы облыстық жұмылдыру дайындығы басқармасының басшысы Серік Сермағанбетов мәлімдеді.– Қазіргі таңда елді мекенге төніп тұрған қауіп жоқ. Арнайы техникалар мен 300-ге жуық адам жұмылдырылып, мұз жару жұмыстары жүргізілді. Су Арал ауданына қарай ығыстырылып, мұз толықтай жүріп кетті. Жоспар бойынша ертеңге дейін Арал теңізіне барып құйылуы керек, – деді басқарма басшысы С.Сермағанбетов.
