ГОЛОВКИН РЕВАНШ ТУРАЛЫ МАҢЫЗДЫ МӘЛІМДЕМЕ ЖАСАЛДЫ
Геннадий Головкиннің (37-0-1, 33 КО) командасы мексикалық Канело Альвареспен (49-1-2, 34 КО) реванш өтпейтіні анық болғандықтан 5 мамырдағы жекпе-жекке жаңа қарсылас іздеуге біржолата кірісуі мүмкін. Оған Дүниежүзілік бокс кеңесінің (WBC) президенті Маурисио Сулейман сенімді, деп жазды sports.kz.«Менің пікірім: ендігі жекпе-жек (Головкин — Канело) өтпейді, ол өлді. Невададағы тыңдалым (Альварестің ісіне қатысты) 18 сәуірге ауыстырылды. Кездесу 5 мамырда қалай өтетінін елестету қиын», — деп Сулейманның сөзінен үзінді келтірді ESPN Deportes.
Естеріңізге салайық, Альварестің екі допинг сынамасынан (17 және 20 ақпандағы) кленбутерол препараты табылған болатын. Оның ісіне қатысты шешімді 18 сәуір күні Невада штатының атлетикалық комиссиясы шығарады. Алдын ала болжам бойынша, боксшы 6-12 айға спорттан шеттетіліп, айыппұл төлеуі мүмкін.
