ҚАЙЫРЫМДЫЛЫҚ МАРАФОНЫ
Үстіміздегі жылдың 13 мамырында қаламызда қайырымдылық «Көктем марафоны – 2018» өтеді деп жоспарланып отыр. Айтулы шара «Ұлт саулығы» идеясын, салауатты өмір салтын насихаттау, бұқаралық спортты дамыту және жас спортшыларды қолдау мақсатында ұйымдастырылады. Бұл жөнінде өңірлік коммуникациялар қызметінде өткен баспасөз мәслихатында «Жастар ресурстық орталығы» КММ директоры Жасұлан Алдабергенов, «Жомарт» мүгедектерге, балалары мүгедек ата-аналарға және тұрмыс жағдайы төмен азаматтарға көмек көрсету» қоғамдық бірлестігінің төрайымы Майя Наримова, «Шуақты бөбек» қоғамдық қор құрылтайшысы Майра Нуркишева кеңінен айтып өтті.– Шараның басты ұйымдастырушылары – Қызылорда облысының жастар саясаты мәселелері және облыстық спорт басқармалары, «Жомарт» қоғамдық бірлестігі, «Шуақты Бөбек» қоғамдық қоры болып табылады. Марафон 13 мамыр күні сағат 09.00-де басталады. Қатысушылар Тұңғыш Президент саябағынан бастап, Сұлтан Бейбарыс көшесі, Тәуелсіздік даңғылы арқылы Ғ.Мұратбаев атындағы стадионға дейін жүгіріп өтеді. Оған 16 жастан жоғары адамдар қатыса алады. Қатысушыларды тіркеу 25 сәуірден 11 мамырға дейін жүргізіледі. Тіркеу жарнасы: жеке қатысушыларға – 500 теңге, командалық қатысушылар үшін – 2500 теңге, – деді Ж. Алдабергенов.
Марафоннан жиналған қаржы «Шуақты бөбек» қоғамдық қоры арқылы дамуында ауытқушылығы бар балаларға арналған оңалту орталығын ашуға жұмсалады.
Айта кету керек, аталмыш бағыттағы марафон өткен жылы да ұйымдастырылған. Онан түскен қаржы "Жастар Үйіне" жұмсалған болатын.
Айтолқын БАТЫРБАЙҚЫЗЫ.
