СЫР ӨРЕНДЕРІ ЖАЗҒЫ ЛАГЕРЬМЕН ҚАМТЫЛАДЫ
Үстіміздегі жылы облыс бойынша 1-10-сынып аралығындағы 140 мыңнан астам баланың 136 200-і лагерьде тынығуға мүмкіндік алады. Бұл олардың 97 пайызға жуығын қамтиды. Бұл бағытта облыс орталығы мен аудандардағы жазғы 9 лагерьде 7 ауысым бойынша жұмыс жүргізіледі. Бұл жөнінде өңірлік коммуникациялар қызметінде өткен баспасөз мәслихатында облыстық білім басқармасының басшысы Майра Мелдебекова мәлім етті.
– Оқушыларға арналған барлық демалыс орындары жұмысын 1 маусымнан бастайды. Биыл облыс көлемінде оларды сауықтыру, білім беру, қызметін көрсететін 485 мектеп жанындағы лагерь жұмыс істейді. Облыстан тыс аймақта орналасқан демалыс орындарында мұнай компанияларының қолдауымен жетім және ата-анасының қамқорлығынсыз қалған, көпбалалы және тұрмысы төмен, мүмкіндігі шектеулі отбасының балалары тынығатын болады, – деді облыстық білім басқармасының басшысы.
Сонымен қатар, жазғы тынығу кезеңінде балалардың қауіпсіздігін қамтамасыз ету мақсатында бірқатар іш-шаралар қолға алынады. Мәселен, облыстық төтенше жағдайлар департаменті мамандары лагерь басшылары мен орынбасарларына мамыр айында «Қауіпсіз жаз-2018» тақырыбымен түсіндірме сабақтары өткізілген. «Балдәурен» республикалық оқу-сауықтыру орталығында жазғы кезеңдегі балалардың демалысын, сауықтырылуын және жұмыспен қамтылуын ұйымдастыру мәселелері бойынша 20 қызметкер біліктіліктерін арттырған.
Айтолқын БАТЫРБАЙҚЫЗЫ.
