Ақмешіт апталығы

  Өткен жылы мемлекеттік жастар саясатын қаржыландыруға жергілікті бюджеттен 679 млн. теңге қаражат бөлінген. Оның ішінде тұрмысы төмен отбасыдан шыққан және күндізгі бөлімде білім алатын 3000-нан астам студентке қоғамдық көлікте қатынауға бірқатар жеңілдік қарастырылған. Ал, қазіргі таңда басқармамен 17 әлеуметтік жоба іске асырылуда. Олардың қатарында бүгінгі буын өкілдерінің бос уақытын тиімді ұйымдастыру, ұлттық құндылықтарды нығайту мен патриоттық тәрбие беру, жұмыспен қамту, облыстық деңгейде өтетін мәдени іс-шаралар, өмірде қиын жағдайға ұшыраған жастарды қоғамдық ортаға бейімдеумен қатар өзге де бағыттағы жобалар бар.Бұл туралы өңірлік коммуникациялар қызметінде өткен баспасөз мәслихатында облыстық жастар саясаты мәселелері басқармасы басшысының міндетін атқарушы Мая Тасқынбаева баяндады. Оның айтуынша, өңірде әртүрлі санаттағы соңғы буын өкілдерінің тұрақты және маусымдық еңбекпен қамтылуына ықпал ету, жұмыссыздарға арналған тегін курстарды ұйымдастыру шаралары да назардан тыс қалмаған. Мәселен, бұл бағытта өткен жылы 4 жоба нәтижелі жүзеге асқан.

– «Жасыл ел» еңбек жасақтарына жастарды тарту жобасы аясында маусымдық кезеңде 1000-нан астам адам еңбек етті. Олар облыс бойынша 250 гектар жерге күтім жасап, 10 гектар аумаққа тазарту жүргізді. Айта кетерлігі, оларды жасаққа қабылдау барысында ең алдымен жұмыссыз, әлеуметтік аз қамтылған отбасынан шыққан қыз-жігіттерге басымдық берілді. Былтыр еңбек маусымында көптеген мердігер мекемелерде 300-ге тарта жас нәпақа тапты. Олардың 64-і тұрақты жұмысқа орналасты. Сондай-ақ, «Педагогикалық жасақтардың қызметін ұйымдастыру» әлеуметтік жобасы аясында аймақтағы жазғы тынығу лагерлерінде 40 тәлімгер еңбек көзін тапты, – дейді басқарма басшысының міндетін атқарушы.

Ал, мұндай бағыттағы жобалардың мақсаты соңғы буын өкілдерін тек қана кәсіпке баулу емес. Сонымен қатар, бұл шара олардың арасында достық қарым-қатынасты нығайту, табиғатқа қамқорлықпен қарау, өзінің жеріне, еліне деген сүйіспеншілігін қалыптастыруға зор ықпал етіп отыр.

Сондай-ақ, «Go working» орталығы жұмысын ұйымдастыру әлеуметтік қызметі» жобасы да сәтті жүзеге асырылған. Аталған шара шеңберінде жұмыссыз жас буын өкілдеріне арналған компьютерлік, құқықтық сауаттылық, бухгалтерлік, ағылшын тілі және өзге де қызмет көрсету курстары тегін ұйымдастырылған. Нәтижесінде 100-ден астам жасқа сертификаттар табысталған.Құқық қорғау органдары білім беру ұйымдарымен бірлесіп, дивиантты мінез құлықты, жазасын өтеп шыққан жастардың қоғамға бейімделуін қамтамасыз ету мен олардың қарым-қатынас ахуалын анықтау, мемлекеттік бағдарламаларды түсіндіру, жұмыс берушілер кеңесін ұйымдастыру мақсатында қоғамдық қабылдаулардың жиі қолға алынуы да өзінің оң ықпалын тигізіп отыр. Сала маманының сөзінше, осындай тиімді шаралардың негізінде өз кәсібін ашуға ниет білдірген жандар қатары артқан. Ал, биыл дарияның сол жағалауынан бой көтеріп жатқан жаңа қаладан жастарға қызмет көрсету орталығы ашылмақ.

Суретті түсірген: Нұрболат НҰРЖАУБАЙ.