КӨПШІЛІКТЕН ҚОЛДАУ ТАПҚАН ӘЛІПБИ
Елбасымыз филолог ғалымдар ұсынған, көпшіліктен қолдау тапқан жаңа әліпбиге көшуге қол қойды. Бұл жазу таңбасы қазақ тілінің ғасырлар бойғы қалыптасқан заңдылықтарын (әсіресе, айтылым заңдылығын) бойына еркін сыйғыза алатын, дыбысқа әріптің саны сәйкес келіп, жазуға да ыңғайлы болатын таңба.
Ең бастысы, қазіргі заманғы ғылым мен техниканың дамуына барынша сәйкес келіп, еліміздің халықаралық деңгейде көрінуіне септігін тигізе алады. Біздің ойымызша, ұлттың, елдің келешегін ойлаған, көзі ашық, көкірегі ояу азамат мұнымен келіседі. Бұл жерде үйрену қиындығы, қаражат қиындығы, тағысын-тағылар екінші кезекке қалдырылу қажет. Бірінші кезекте елдің, тілдің тәуелсіздігі, содан туындайтын қажеттілік және тәуекел тұруы керек. Әрине, қай уақытта да өтпелі кезеңнің қиындығы болмай тұрмайды. Оның талайын халқымыз қара нардай қайыспай көтеріп алған, бастан өткізген, әлі де өткізіп келеді. Алайда, осыдан он жыл бұрынғыға қарағанда әлдеқайда жақсымыз, шүкіршілік жасауға болады. Әріп өзгертудің алғашқы кезеңінде де түрлі қиындықтар болуы әбден заңды. Өз басым қазақ үшін латын әрпі лайықты деп есептеймін. Жаңа әріпке көшкеннен кейін бірден барлық баспаларды бұрынғы орыс әрпімен басылған жәдігерлерді латын әрпіне көшіруге жұмылдыру қажет. Бұл айтылғандардың бәрі, әрине, өзіміздің субъективтік көзқарасымыздан туған ұсыныс іспетті пікірлер ғана. Ой-пікіріміздің осы бір ұлы іске кішкене де септігі тиер болса, мақсатымыздың орындалғаны деп түсінеміз.
Жеңіс СӘДУАҚАСҰЛЫ,
Қорқыт ата атындағы ҚМУ профессоры,
филология ғылымдарының докторы.
