СУДАН КЕЛЕР ҚАУІП КӨП
Жаздың аптап күндері басталды. Мұндайда жергілікті тұрғындар дария жағасына қарай ағылады. Бірақ, адамдардың суда қауіпсіздік ережелерін сақтамауы орны толмас қайғыға әкеп соғады. Немқұрайдылықты сүймейді. Кейбір тағдыр иелерінің өмірін келтеден қияды. Мәселен, ересек адамдар арасындағы өлімнің негізгі себебі – мас күйде суға түсу, судағы жүріп-тұру ережесін сақтамау және тыйым салынған орындарда демалу. Тағы бір себебі – өз күшіне сенгендік. Ал, балалар арасында орын алатын бұл қайғының негізгі себебі – ата-ана бақылауынан тыс суға түсу олардың өмірін ете үзеді.Өткен жылы 26 адам тілсіз жаудың құрбаны болған. Өкінішке орай, олардың 7-і бала. Жеткіншектердің көбісі рұқсат етілмеген, құтқару жасағы жоқ орындарда суға түскен. Жаз айларындағы демалыс кезінде әрбір ата-ана балаларының қауіпсіздігі үшін оларды назарынан тыс қалдырмауы тиіс. Осы орайда, мектеп жасындағы өрендерді жүзу басайіндерінде жүзуге үйрету кеңінен айтылып жүр. Мәселен, өткен жылы 2136 бала арнайы орындарда сондай игілікті шараның шарапатын көрді. Сонымен қатар, үстіміздегі жылы Арал ауданындағы «»Қамбаш» балаларды сауықтыру және қосымша білім беру орталықтарында 208 жас өрендер суға жүзудің қыр-сырына қанықты.
Тұрғындар қала аумағындағы «Мерей» мөлтек ауданы, «Қорқыт ата» кешені және «халыққа қызмет көрсету орталығы» аумақтарында орналасқан 3 жабайы жағажайда суға түседі. Ол жерлерге енді арнайы белгілер қойылады. Сол жерлерден аспау және ең бастысы ата-ана қадағалауынсыз суға шомылуды азайту керек. Мамандар кенеттен келетін қауіптің алдын-алу үшін шаралар жасап отырады.
– Облыс орталығында Арай мөлтек ауданы мен Белкөл кентінің маңында рұқсат етілген 2 жағажай тіркелген. Қазіргі уақытта жергілікті полиция қызметкерлерімен бірлесіп тұрғындардың арасында судағы қауіпсіздікті сақтауға байланысты түсіндірме жұмыстары жүргізілуде. Мәселен, кісі көп жиналатын су жағалауларында кезекшілікке тұрып, ондағы демалушыларға суға түсу ережелері жазылған арнайы парақшалар таратылады. Бірақ, көпшілігі қатердің алдын алуға тырыспайды. Соңында қайғылы жағдайға душар болып жатады, – дейді төтенше жағдайларды жою бөлімінің бастығы Әлімжан Марданов.
Иә, күннің ыстығында салқын судың жағасында демалғанға не жетсін. Бірақ, салғырттық адамның түрлі келеңсіз жағдайға ұшырауына алып келеді. Сондықтан қауіпсіздік шараларын басты назарда ұстағанымыз дұрыс.
Айтолқын АЙТЖАНОВА.
