АСТАНАДА «ҚАЗАҚСТАН БАРЫСЫ-2018» ТУРНИРІНЕ АРНАЛҒАН БАСПАСӨЗ МӘСЛИХАТЫ ӨТТІ
Бүгін Орталық коммуникациялар қызметінде ҚР Тұңғыш Президентінің жүлдесі үшін қазақ күресінен «Қазақстан Барысы» IХ республикалық турниріне орай баспасөз мәслихаты өтті. Шараға «Қазақстан Барысы» қорының төрағасы Арман Шораев, «Qazaqstan» Ұлттық телеарнасының директоры Еркін Мұхамеджанов, меценат Оралбек Ботбай және «Қазақстан Барысы-2013» жеңімпазы Айбек Нұғымаров қатысты.Елорданың 20 жылдық мерейтойына арналып, тоғызыншы рет өткелі жатқан турнирдің жаңалығы жетерлік. Биыл ОҚО-да іріктеу өткен палуандар енді Түркістан облысының атынан өнер көрсетсе, Шымкент қаласының намысын екі палуан қорғайды. Осылайша, беделді бәсекеге еліміздің 14 облысы, Астана, Алматы, Шымкент қалаларынан 37 үздік палуан бақ сынайды. Бұдан бөлек, ұлттық бояуға толы дода барысында жанкүйерлер арасында автокөлік ойнатылады. Жарысқа қатысушы палуандар Астанаға 28 маусым күні келеді. Ал, 29 маусым сағат 19:30-ға ресми салмақ өлшеу рәсімі белгіленген. Астанадағы «Хан Шатыр» сауда үйінің орталық алаңында түйе балуандар мыңдаған халықтың алдына шығып, БАҚ өкілдерімен сұхбаттасады. Биылғы жарыстың жүлде қоры да қомақты. Жеңімпаз атанған палуанға алтын белбеу және алтыннан құйылған «тайтұяқ» табысталады. Екінші және үшінші орынға сәйкесінше күміс және қола белбеу беріледі.
Сонымен қатар, ақшалай жүлделер төмендегідей:
Әр белдесудегі жеңіске - 100 000 теңге;
ІІІ орын - 1 800 000 теңге;
Бапкеріне - 900 000 теңге.
ІІ орын - 5 500 000 теңге;
Бапкеріне - 1 800 000 теңге;
І орын - 25 000 000 теңге;
Бапкеріне - 3 500 000 теңге.
Белгілі болған тағы бір жайт, «Қазақстан Барысы» қорының төрағасы Арман Шораев алдағы уақытта қазақ күресінен Каспий теңізі жағалауындағы елдер арасындағы турнирді ұйымдастыру жоспарда барын айтып өтті. Ол «Каспий барысы» деп аталуы мүмкін. «Қазақстан Барысы» турнирінің әр жылдағы жеңімпаз және жүлдегерлері бүгінде халық арасында өте танымал, бүгінгі күннің батырларына айналған үздік палуандар тізімі төмендегідей:
2011 ж. - 1. Ұлан Рысқұл 2. Бейбіт Ыстыбаев 3. Шалқар Жоламанов
2012 ж. - 1. Бейбіт Ыстыбаев 2. Шалқар Жоламанов 3. Айбек Нұғымаров
2013 ж. - 1. Айбек Нұғымаров 2. Ержан Шынкеев 3. Жұманазар Ерсұлтанов
2014 ж. - 1. Мұхит Тұрсынов 2. Асыл Бәрменов 3. Руслан Әбдіразақов
2015 ж. - 1. Бейбіт Ыстыбаев 2. Руслан Әбдіразақов 3. Ғани Сейділдаев
2016 ж. - 1. Бейбіт Ыстыбаев 2. Жұманазар Ерсұлтанов 3. Айбол Айтбек
2017 ж. - 1. Еламан Ерғалиев 2. Ұлан Рысқұл 3. Айбек Нұғымаров.
Айта кетейік, 1 шілде күні «Қазақстан Барысы-2018» турнирін «Qazaqstan» және «Qazsport» телеарналары тікелей эфирде көрсетеді. Басталу уақыты: 13:00.
kaztrk.kz
