ЖАҢА МЕКТЕПТЕРДЕ АЛҒАШҚЫ ҚОҢЫРАУ СОҒЫЛДЫ
1-қыркүйек күніеліміздің барлық мектептерінде алғашқы қоңырау салтанаты өткізілді. Білім күніне орай аймағымызда бірқатар білім ошақтары оқушыларға есігін айқара ашты. Мәселен, мереке күні Жаңақорған ауданында 2 жаңа мектеп пайдалануға берілген. Оның бірі – Түгіскен ауылындағы 300 орындық №256 мектеп. Оның ашылу салтанатына облыс әкімінің орынбасары Руслан Рүстемов қатысып, аймақта әлеуметтік саланың дамуына баса назар аударылатынын атап өтті.– Биылғы жыл Түгіскен ауылының тұрғындары үшін жағымды жаңалықтарға толы болды. Мамыр айында ауылда 140 балаға арналған балабақша және спорттық-сауықтыру кешені пайдалануға берілген болатын. Бүгін жаңа мектепте алғашқы қоңырау соғылады. Жалпы, аймақта әлеуметтік салаға басымдық беріліп отыр. Бірнеше жылдан бері облыстық бюджеттің ауқымды бөлігі әлеуметтік жобаларды қаржыландыруға жұмсалуда, – деді облыс әкімінің орынбасары.
Осындай 300 орындық мектеп Жаңақорған кентінде де іске қосылған. Атап өтейік, Жаңақорған ауданында биыл 4 білім ошағы пайдалануға берілетін болады. Бұған дейін Жаңақорған ауданының Қожамберді ауылында 200 орындық №162 мектеп ашылған болатын. Сонымен қатар, жыл соңына дейін Аққұм ауылындағы 100 орындық білім ұясының да құрылысы аяқталады деген жоспар бар.
Сондай-ақ, 30 тамыз күні Қазалы ауданының орталығында, Әйтеке би кентінде 300 орындық мектеп пайдалануға берілген болатын.
Аймағымызда соңғы 5 жылдың ішінде 45 білім ошағы, оның ішінде 37-сі апаттық мектептің орнына салынған. Ал, жыл соңына дейін Арал қаласында 300 орындық және Қызылорда қаласында 600 орындық мектеп ашылады деп жоспарланып отыр.
Айтолқын АЙТЖАНОВА.
