ШИЕЛІДЕ ӘЛЕУМЕТТІК МАҢЫЗЫ БАР НЫСАНДАР ПАЙДАЛАНУҒА БЕРІЛДІ
Конституция күніне орай, Шиелі кентіндегі №45 Ақ-орда мектеп-гимназиясының жаңа корпусы пайдалануға берілді.Оқу ордасының жаңа корпусын салуға облыстық бюджеттен 224 млн. 569 мың теңге бөлініп, құрылыс жұмыстары жүргізілген. Мектеп ғимаратының жаңа корпусы 2 қабатты, 8 бөлмеден және 100 орындық асханадан тұрады.
Салтанатты жиынға аудан әкімі Әшім Оразбекұлы қатысып, жиналған қауымды қуаныштарымен құттықтады.
- Қадірлі ағайын, құрметті ұстаздар, баршаңызды бүгінгі Конституция күнімен, алдағы Білім күні мерекесімен құттықтаймын. Қос мереке қарсаңында №45 Ақ-орда мектеп-гимназиясының жаңа корпусы ашылып, тағы бір қуанышқа кенеліп жатырсыздар. Ендеше жаңа мектеп корпусы құтты болсын, - деді Әшім Оразбекұлы.
Жалпы ауданда білім беру саласындағы жұмыстар жүйелі. Соның нәтижесінде білім беру саласы жыл сайын жаңа мектептермен толығуда. Айта кету керек, бұл күні Шиеліде мұнан басқа бірқатар нысандар ел игілігіне берілді.
