Қызылордада өзін әкімдік қызметкерімін деп таныстырған жігіт алаяқ болып шықты
Қызылордада телефон арқылы жергілікті тұрғындардан ақша бопсалауды көздеген жігіт ұсталды, деп хабарлайды ҚазАқпарат тілшісі.1994 жылғы келген жігіт өзін жұртқа әкімдік қызметкері ретінде таныстырады. Солайша оңай жолмен ақша табуды көздеген алаяқ тәртіп сақшыларының қолына түсті. «Осындай жолмен әлгі азамат бір мекеме басшысына хабарласады. Одан 300 мың теңге көлемінде ақша талап еткен. Полицияға одан бөлек тағы екі шағым түскен. Полиция қызметкерлерінің жүргізген жедел іздестіру жұмыстарының нәтижесінде күдікті тұлға анықталды», - деді Қызылорда облыстық полиция департаменті баспасөз қызметінің басшысы Гүлжаһан Қайырбергенова. Бүгінгі күні аталған дерек бойынша ҚР Қылмыстық кодексінің 190-бабы 1-бөлігімен сотқа дейінгі тергеу жүргізілуде. Күдіктіден жауап алу барысында ол өзінің кінәсін толығымен мойындаған. Қазіргі таңда күдіктінің басқа да қылмыстарға қатыстылығын анықталу үстінде.
