ЖЕМҚОРЛЫҚТЫҢ ЖОЛЫ КЕСІЛМЕК
Үстіміздегі жылы ашық келісім аясында атқарылған жұмыстар барысы бойынша мемлекеттік қызмет істері және сыбайлас жемқорлыққа қарсы іс-қимыл департаменті облыстық коммуникация орталығында баспасөз мәслихатын өткізді. Оған департаменттің сыбайлас жемқорлық профилактикасы басқармасының басшысы Р.Тәуекелов, «Самұрық» инновациялық идеяларды қолдау орталығының жоба жетекшісі Э.Тұсмағанбетова қатысты.Аталмыш ашық келісім төрт бөлімнен тұрады. Қазір 43 азаматтық институттармен бірлесе жұмыс атқаруда. Биылдың өзінде осы шара аясында 291 – семинар, 10 – байқау, 48 – дөңгелек үстел өткен. Ал, жобаның жастарға арналған бағытын «Самұрық» инновациялық идеяларды қолдау орталығы жүзеге асырып отыр. Өйткені, студенттер арасындағы түрлі байқаулар мен пікір таластарды осы қоғамдық қор ұйымдастыруда.
– Жыл бойы «Сыбайлас жемқорлықсыз қоғам» атты акциялар өткізілді. Мұнда 2015-2025 жылдарға арналған сыбайлас жемқорлыққа қарсы стратегиясының негізгі ұғымы баса айтылуда. Сондай-ақ, оның алдын алудың түрлері мен әдістері кеңінен талқыланып жүр. Ал, сапалы мемлекеттік көрсетілетін қызметтер және аталмыш қызметке түсу тәртібі туралы түсіндірме жұмыстары жүргізілуде. Осының нәтижесінде бүгінде сыбайлас жемқорлықтың саны біршама төмендеп отыр, – деді Р.Тәуекелов.
Шара соңында журналистер арасында өткен «Бұқаралық ақпарат құралдары сыбайлас жемқорлыққа қарсы» атты облыстық байқаудың қортындысы бойынша жеңімпаз деп танылған әріптестер марапатталды.
Ақмарал ОЛЖАБАЕВА.
