ДАРИЯДАҒЫ ҚАУІПТІ УЧАСКЕЛЕР ҚАЛПЫНА КЕЛТІРІЛУДЕ
Қызылорда облысы аумағына түсіп жатқан су көлемі секундына 930 текше метрді құрап, Қызылорда су торабынан төменге 820 текше метр су жіберілуде. Бұл өткен жылдың осы мерзіміндегі су көлемінен бірнеше көп. Бұл туралы облыстық жұмылдыру дайындығы басқармасының басшысы С. Сермағамбетов облыс әкімінің төрағалық етуімен болған төтенше жағдайлардың алдын алу және жою жөніндегі комиссия отырысында баяндады. Сырдария өзенінің қорғаныс бөгетінің 91 қауіпті учаскесін қалпына келтіру белгіленіп, тиісті шаралар қабылдануда. Жалпы бұл жұмыстарға барлығы 99 бірлік арнайы техникалар мен 122 адам жұмылдырылуда. Су тасқынының алдын алу бойынша қауіпсіздік шаралары күшейтілуде. Облыс аумағындағы су басу қаупі бар елді мекендер бар. Сол себепті, аймақ басшысы жауапты тұлғаларды босаңсымай, берілген тапсырмаларға аса жауапкершілікпен қарап, бұлжытпай орындауды тапсырды.
