ЖЫЛУ МАУСЫМЫНДА САҚТЫҚ КЕРЕК
Ағымдағы жылы облыс бойынша 380-нен астам өрт оқиғасы орын алған. Ол өткен жылмен салыстырғанда 13 пайызға өскен. Келеңсіз оқиғалар салдарынан 3 адам қаза болып, 9 адам емдеу мекемелерінің көмегіне жүгінген. Ал, биылғы жылдың жылыту маусымында да түтінге және табиғи газға улану дерегі тіркелген. Зардап шеккендердің қатарында жасөспірімдер де бар.Бұл туралы өңірлік коммуникациялар қызметінде өткен баспасөз мәслихатында төтенше жағдайлар департаментінің өрт қауіпсіздігі саласындағы бақылау және профилактикалық қызмет басқармасының бастығы Руслан Қайрақбаев пен қалалық төтенше жағдай басқармасының бастығы Ербол Әлішеров баяндады. Сала мамандарының айтуынша, тілсіз жаудың пайда болуына көбіне тұрғындардың өртке қауіпсіздік ережелеріне немқұрайлылық танытулары себеп екен. – Облыс аумағында тіркелген өрт дерегінің 171-і қалаға тиесілі. Оның 23 пайызы автокөлік ақауынан пайда болған. Негізі, бұл бағыттағы келеңсіз оқиғалардың 70-80 пайызынан астамы жеке тұрғын үйлерде орын алады. Себебі, тұрғындар қауіпсіздік ережелерін сақтамай, пеш жағу әрекеттері жиі кездеседі. Сондай-ақ, пеш мұржаларындағы ақаулар, олардың уақытылы тазаланбауы, сымдардың дұрыс тұйықталмауы, ашық от пайдаланудағы аңғалдық осының барлығы өрттің туындауына ықпал етеді. Әсіресе, мұндай жағдайлар жылыту маусымдарында өрши түседі. Сондықтан оған аса сақтықпен қараған жөн, – дейді Руслан Қайрақбаев. Сондай-ақ, құзырлы мекеме өкілдері жеке тұрғын үй пештерін арнайы мамандар көмегімен орнатуға кеңес береді. Айта кетейік, аталмыш сала қызметкерлері тарапынан алдағы жылыту маусымында тұрмысы төмен отбасыларға көмек ретінде пеш құрылғыларын тегін тазалап беру шаралары жүзеге асырылмақ.
Бағлан ТІЛЕУБЕРГЕНОВА.
