КОНДУКТОР-АСАБА: ЖОЛ АҚЫСЫН ӨЛЕҢМЕН СҰРАҒАН ЖІГІТ ЕЛДІҢ КӨҢІЛІН КӨТЕРДІ (ВИДЕО)

Қазағым сені көрсем шаттанамын, Кондуктор болғаныма мақтанамын! Қоғамдық көлік ішінде дәл осылай деп жыр төккен жас жігіт жолаушылардың көңілін көтеріп қана қоймай, желі жұлдызына айналды, деп хабарлайды Stan.kz.

Себебі жол ақысын төлеуді өлең арқылы өтінген кондуктордың видеосын басқа емес, әнші Бағлан Әбдірайымов бөлісті.

“Кептеліс пен жұмыстан шаршап жүрген ағайынға мына жігіт керек екен”, – деп пікір білдірді ол.

Желідегілер өнерлі жігіттің кондуктор болып, қор болып жүргенін атап өтті. Көпшілік жас жігіттің тұнып тұрған талант екенін айтып, оған асаба болуға кеңес берді.

“Мына жігітпен тойда отырғандай сезінеді екенсің”, “Анау-мынау асабаларды жолда қалдырады бұл жігіт”, “Кондуктор болып қор болып жүр ғой”, – деп жазды желі оқырмандары.