Аймақ басшысы Арысқа барды
Қызылорда облысының әкімі Қуанышбек Ысқақов Арыс қаласына жұмыс сапарымен барды. Онда Сыр өңіріне бөлінген №6 аумақтағы қалпына келтіру жұмысын аралап, халыққа қызмет көрсету кешенінің құрылысымен танысты. Бұл аймақта 268 тұрғын үй, 5 әлеуметтік және 10 кәсіпкерлік нысан орналасқан. Қазіргі таңда жарамсыз деп танылған үйлерді бұзып, оның орнына жаңа баспана сатып алынды. Ал қалған үйлерге құрылыс жұмыстары қайта жүргізіліп, жөндеуден өткен. Аталған іске 20 құрылыс мекемесі атсалысып, жүктелген міндетті толық аяқтады.Сондай-ақ аймақ басшысы Түркістан облысындағы халыққа қызмет көрсету кешенінің құрылысымен танысты. Жалпы ауданы 3 мың шаршы метрді құрайтын шығыс үлгісіндегі монша тәулігіне 100 келушіні қабылдай алады.
Облыс әкімі Қуанышбек Ысқақов халық игілігіне берілетін әлеуметтік нысандар белгіленген уақытта толық аяқталатынын жеткізді. Бүгінгі таңда кешен қабырғалары мен бағаналарына ішкі әрлеу жұмыстары жүргізілуде.
Айнұр ТӨРЕМҰРАТОВА
