САНДАР СӨЙЛЕЙДІ: 12 САНЫНЫҢ ҚАСИЕТІ. ҚАЗАҚЫ НАНЫМ-СЕНІМ
Қазақтың лиро-эпос жырларында да 12 санын кездестіруге болады:«Орай да орай оқ атқан
Он екі тұтам жай тартқан!»
(«Қобыланды батыр»)
«Он екі айдың жартысы жаз болады,
Жаз белгісі үйрек пен қаз болады»
(«Қозы Көрпеш – Баян сұлу»)
«Үлкендігі басының
Он екі қарыс қазандай»
(«Қамбар батыр»)
деген сөз тіркестері 12 санын ерекше қасиет тұтудың белгісі.
12 саны қазақ халқының ертегілерінде, өлеңдерінде, жұмбақтарында да жиі кездеседі. Мысалы:
Біз, біз, біз едік,
Біз он екі қыз едік.
Тап боп отқа шоқ болдық,
Таң атарда жоқ болдық.
Бұрынғы қариялар мектепке баратын балаларға тілек-бата айтатын: «Хатты тез танып, кітапты көп оқып, Лұқпандай хакім, Атымтайдай жомарт, 12 ғалымның тілін білсін» деп.
Қазақта Ораза айын 12 айдың сұлтаны дейді. Өйткені осы айда дау-дамайдан, ұрыс-керістен, ұрлық-қарлықтан арылып, тек денсаулықты, тазалықты, жақсы мінезді қалыптастыру керек.
Жылқы малын сойғанда, соғым етін 12 жілікке бөлуі, киіз үйдің де 12 қанатқа дейін болуы санның қасиеттілігінен болар.
http://reactor.inform.kz/kz/sandar-soyleydi-12-sanynyn-kasieti-kazaky-nanym-senim-a52435
