Жақсы келін – ырысың
Қазақта «Келіні жақсы үйдің керегесі алтын» деген аталы сөз бар. Ұлттық санамызда ол жайында көптеген ұғым бар. «Келіннің аяғынан, қойшының таяғынан» демекші, жаңа түскен қалыңдық сол шаңыраққа бақ-берекесі мен ырыс-несібесін ала келеді деген сенім айтылады. Осы аптада қаланың сол жағалауындағы Жастар орталығында ұлттық әдет-ғұрып пен салт-дәстүрді берік ұстанған қазақ келіндерінің арасында «Ақ отау» сайысы ұйымдастырылды. Үй шаруасы мен қоғам жұмысын қатар алып жүрген нәзік жандылар байқауда да белсенділік танытты. Олар алдымен сахнада өздерін таныстырып, қазақтың салт-дәстүрі жайында қойылған сауалдарға жауап берді. Одан соң ортаға өз өнерін паш етіп, ұмыт болған ұлттық тағам дайындаудан сынға түсті.
Тағылымы мол шарада ұлттық құндылықтар ерекше көрініс тапты. «Қолында өнері бардың, аузында өлеңі бар» дегендей, сайысқа қатысушы жас келіндер өздерінің отбасылық өмірдегі міндеттерін қалай атқара алатындығы сарапқа салынды.
Шара соңында қала әкімінің орынбасары Мира Қазбекова белсенділік танытып байқауға қатысқан әр отбасыға шынайы алғысын білдіріп, шаңырақтарына шаттық пен бақ береке тіледі. Сайыс қорытындысы бойынша келіндер жүлделі орынға ие болып, бағалы сыйлықтар табыс етілді.
Айнұр МАМАНҚЫЗЫ
