Қылмыс жасау деңгейі төмендеді
Бүгінгі таңда аймақта құқық бұзушылықтың алдын алуға байланысты жүйелі жұмыстар жүзеге асуда. Қылмыстық іс жүйесі жаңғыртылып, «Е-Қылмыстық іс» жобасы іске қосылған. Бағдарлама қылмыстық құқық бұзушылықтарды тіркеуден бастап қылмыстық процестің барлық сатыларын және үкімнің орындалуына дейінгі саланы қамтиды. – Қызылорда облысы құқық бұзушылық бойынша еліміздегі аймақтар арасында 7 орында тұр. Өткен жылдың осы мерзімімен салыстырғанда қылмыс 15 пайызға төмендеген. Оның ішінде осы жылдың 9 айында кәмелетке толмағандардың қатысуымен 78 қылмыстық құқық бұзушылық жасалған. Ол өткен жылмен салыстырғанда 17 пайызға кем, – деді өңірлік коммуникациялар қызметінде өткен брифингте облыс прокурорының бірінші орынбасары Талғат Әлібаев.
Бүгінгі таңда облыстық прокуратураның бастамасымен өңірдегі құқықбұзушылықтар профилактикасының кешенді жоспары бекітілуде.
– Қазір өңірде 2000-ға жуық адам пробациялық есепте тұр. Пробациялық бақылау орнатылған тұлғалар 3 санатқа бөлініп, тізімі жасалды. Біздің қызметкерлер қалалық пробация есебіндегі 679 адамның мекен-жайына бару арқылы тексеру жүргізді. Аймақта азғындық ісі бойынша қылмыс көрсеткіші төмендеді. Ал 12 қылмыстық іс бойынша үкім шығарылды. Одан бөлек 3 сотталушыға химиялық кастрация түрінде мәжбүрлеп емдеу шарасы қолданылды, – деді Т.Әлібаев.
Айтолқын БАТЫРБАЙҚЫЗЫ.
