Синоптиктер қазақстандықтарды қандай ауа райы күтіп тұрғанын айтты
Қазгидромет 21-23 қараша күндеріндегі ауа райына болжам жасады, солтүстік облыстарда аяздың беті қайтады деп болжанып отыр. Қазақстанның оңтүстігі мен оңтүстік-шығысында қар жауып, бұрқасындатады, ауа температурасы төмендейді, деп хабарлайды Sputnik Қазақстан.
Қазгидрометтің ақпаратынша, Қазақстанға Карск теңізінен келген суық ауа массаларының әсерінен республиканың солтүстік, орталық және шығыс облыстарында күн суытты. Түнде ауа температурасы -28...-32°С дейін төмендесе, күндіз -18…-23°С шамасында болды. Бұл орташа көпжылдық мәннен -8…-13°С төмен.
"Оңтүстік бағытта ығысқан арктикалық суық ауа ағымдарынан елдің оңтүстігі мен оңтүстік-шығысынжа қар жауып, бұрқасындатады, солтүстік-шығыстан екпінді жел соғады. Ауа температурасы төмендейді", - делінген хабарламада.
Ал, солтүстік облыстарда, синоптиктердің болжамынша, Батыс Сібірдің солтүстігінен ығысатын кезекті циклонның әсерінен 22-23 қараша күндері аяздың беті қайтады.
