Қызылордалық журналист 1 млн теңге жеңіп алды
Kyzylorda-news.kz ақпараттық агенттігі басшысының орынбасары Исаев Жәнібек Мырқыұлы «Қазақтелеком» АҚ БАҚ өкілдері арасында ұйымдастырған байқауда бірінші орынды жеңіп алды.Байқау ағымдағы жылдың 28 тамызы мен 28 қыркүйек аралығында жүргізілген. Қазылар алқасы қазақ және орыс тілінде 50-ге жуық мақаланы талдап-таразылады. Байқау қорытындысы бойынша әріптесіміз Жәнібек Исаев «Телекоммуникация: кеше, бүгін және ертең» тақырыбында сараптамалық мақала жариялап 1 млн теңге ақшалай сыйлыққа ие болды.
«Біз ең жақсы аналитикалық материалға конкурс жарияладық. Оның ерекшелігі қазіргі ақпаратты сүзгіден өткізіп, статистикалық деректерді талдау, пікірлер жинауды қамтиды. Сондай-ақ шығармашылық компонентке ерекше назар аударылды. Үш жеңімпазды таңдау өте қиын болды. Байқауға келіп түскен мақалалардың көбінде байқау талаптары нақты орындалған. Алайда біз ең үздіктерін таңдап алдық», - дейді «Қазақтелеком» АҚ басқарма төрағасы Қуанышбек Есекеев.
